Shillong, Nailur 21: Ki Pulit ka Jylla Meghalaya kiba dang iai bteng ban iakhun thma pyrshah ia u drok, ha ka 20 tarik mynta u bnai ki Pulit ki la ioh jingtip na uwei u nongniah kali Tata Sumo shaphang kawei ka pla ba ishankhmat ba la iehnoh hapoh ka kali Tata Sumo jong u da ki arngut ki nongshong kali.
Ha kane ka pla, ynda la khura ha Madanrting Police Station la lap haduh 21 tylli ki synduk thep sabon kiba la thep ia u drok Heroin uba khia 253.53 gram bad katto katne ki jaiñ.
U Superintendent of Police jong ka East Khasi Hills District u Bah Sylvester Nongtnger u la iathuh ba une u drok u dei uba shongdor palat 2 klur tyngka.
Ha kaba iadei bad kane ka jingioh kurup ia u drok, ki Pulit ki la register case ha Madanrting Police Station hapoh ki kyndon jong ka Section 21(c)/29 NDPS Act. Ki Pulit ki la pynlong ka jingtohkit kaba bniah bad ka jingthwet kaba jur ban iohkem ia ki snar khaii drok.
