Khliehriat, Naitung 15 : Ka jingialang iamir jingmut jong ka Jylla Meghalaya bad Assam ka long ha ka 15 tarik, Naitung, 2023 ha Holy Cross Secondary School Umkiang, East Jaintia Hills District, ban iakren halor ka jingiapynbeit pud hapdeng kine ki ar tylli ki jylla ha ka wat kaba ar.
Ia ka jyllla Meghalaya la lamkhmat da u Symbud Myntri Rangbah ka Jylla u Bah Sniawbhalang Dhar, ka MLA jong ka Saipung ka Kong Santa Mary Shylla, u Chief Executive Member ka Jaintia Hills Autonomous District Council u Bah Thombor Shiwat katba ia ka Assam la lamkhmat da u Myntri ka tnat Forest u Chandra Mohan Patowary uba dei u MLA jong ka Dharmapur Constituency.
Ha kane ka sngi la sakhi lang da ki bor synshar District, ki ophisar na ki tnat treikam Sorkar bad ki nongialam shnong jong kane ka thain.
U Bah Sniawbhalang Dhar ha ka jingiakren bad ki lad pathai khubor, u la pyntip ba ka shnong Baikam kaba don 37 ki longiing ka la pynpaw ba ka don ia ka jingangnud ban rung sha ka jylla Meghalaya bad u la ong ba ia kane ka jingdawa yn sa pynbeit ha kane ka kynti.
