Shillong, Jymmang 06: Ka Hynniewtrep Youths Council (HYC) ha ka lah sngi U Blei ka la aiti da ka jingthoh ha u Chief Executive Officer (CEO) ka Shillong Municipal Board (SMB) ban dawa ba dei ban weng noh ia ka jaka bret niut ha Motphran, Shillong.
Ka seng ka la pynksan ia kane ka jingdawa da kaba pyntip ba ha ka 2 tarik mynta u bnai ki dkhot ka seng ki la leit jurip ia ka jaka bret niut ba la buh da ka Shillong Municipal Board ha Motphran hadien ba la ioh ia ka jingujor na ki paidbah ba bun balang.
Ha ka jingjurip ka seng ka la lap ba kane ka jaka bret ñiut ym tang ba ka pynmih ia ka jingsma iwtung kaba ktah ia ka koit ka khiah jong ki nongleit nongwan hynrei ka la kylla long ka jaka die bad jaka dih drok jong ki briew kiba ju pyndonkam ban leh ia kine ki kam sniew haba shit bashai.
Katkum ka dorkhas ba la aiti ha u CEO ka Municipal ba la soi da u Vice President Bah Francis G. Mawlong ka seng ka la pyntip ba kine jingdih drok ki jia wat ha ka por mynsngi bad pyntip ruh ba ka seng ka la ioh bat ia ki briew kiba dang dih drok ha kane ka jaka ha ka sngi ba la leit jurip.
“Ka jingdon jong ka jaka bret niut ym tang ba ka long ka jaka kaba shngain ia ki nongdih drok ha ka jaka ba iohi lut ki paidbah nongleit nongwan hynrei ka pynlong ia ka Motphran kum ka Marten, ia kaba yn ym lah satia ban pdiang bad kaba dei ban pynrem da baroh namarba ia ki jaboh jabaiñ la shu ieh lyngkrang bad saphriang ha surok kaba don hapdeng jong ka sor,” la ong ka dorkhas na ka seng.
“Namarkata, ngi dawa ba dei ban weng noh mardor ia kane ka jaka bret ñiut bad ban pynkhuid pynsuba noh mardor ia kane ka jaka hynrei lym kumta ngim banse ban weng hi noh dalade,” la maham ka seng.
