Shillong, Nohprah, 18: Ka Jylla Meghalaya ha ka Lah Sngi u Blei ka la rakhe kynmaw burom ia ka lyngkhuh sngi iap kaba 83 snem jong u Soso Tham, u Myllung bakhraw jong ka ri Khasi uba la noh synñiang shikatdei eh sha u sup u thiar jong ka thoh ka tar Khasi.
La sakhi ba ki kynhun bapher bapher ki la leit buh syntiew hakhmat u durmot jong u Soso Tham ha phyllaw jong ka State Central Library, Shillong kiba kynthup ia ki bahaing hasem jong u Myllung Soso Tham, ki dkhot bad ki nongialam jong ka Federation of Khasi Jaiñtia and Garo People (FKJGP) ba la lamkhmat da u President u Bah Dundee C. Khongsit, ka Hynñiewtrep Youths Council (HYC) ba lamkhmat da u President u Bah Roy Kupar Synrem bad kiwei kiwei.
Nalor ki sengbhalang, la sakhi ruh ia ki dkhot jong ka National People’s Party (NPP) Youth Wing kiba la leit ban buh syntiew hakhmat u durmot jong u Myllung Soso Tham ba la lamkhmat da u MLA barim jong ka Mylliem Constituency u Bah Hamletson Dohling bad ki dkhot.
Ha kane kajuh ka sngi, ka Khasi Students Union, ka la kynmaw burom da kaba leit buh syntiew hakhmat u durmot jong u Soso Tham uba don hakhmat jong ka Khasi Department ka skulbah NEHU.
Ka Khasi Student’s Union, South Khasi Hills Unit, ha kane ka sngi ka la kynmaw burom da leit buh syntiew hakhmat u durmot jong u Myllung Soso Tham uba la tei ha ka shnong Saitsohpen, Sohra.
Ha rilum Jaiñtia, ka Khasi Author’s Society (KAS), shnat Khliehriat ryngkat ka jingiatreilang bad ka Khasi Department jong ka Jaintia Eastern College, Khliehriat ka la rakhe ia ka lyngkhuh sngi iap jong u Myllung Soso Tham da kaba pynlong ia ka lympung iamir jingtip halor ka phang, “u synñiang jong u Myllung Soso Tham sha ka jaitbynriew Khasi”, ia kaba la pynlong ha Jaintia Eastern College, Khliehriat.
Ha kane ka sngi la sakhi lang da u MP ka Rajya Sabha u Dr. WR. Kharlukhi uba la long kum u Kongsan, u Myntri ka Sorkar Jylla Bah Kyrmen Shylla kum u symbud kongsan, u President ka Khasi Authors Society u Dr. DRL Nonglait, u Principal jong ka Jaintia Eastern College, Khliehriat u Dr. Phervision Nongtdu, u Vice President jong ka KAS, shnat Khliehriat u Bah ES. Shangpliang, ka Prof. S. Dkhar kaba dei ka Head jong ka Khasi Department, NEHU, Shillong, ki nonghikai bad ki samla pule jong ka Thomas Jones Synod College, Jowai, ka Kiang Nangbah Govt. College, Jowai, ka Nongtalang College, ka Don Bosco College, Byndihati bad ka Jaiñtia Eastern College, Khliehriat.
U Dr. Kharlukhi u la pyllait paidbah ruh ïa ka kot ‘Shi Hara ki sur Myllung bad ki Esse” ba la thoh da u Dr. Davidson Diengdoh.
