Shillong, Nohprah, 18: U MDC shu sieh ha Khasi Hills Autonomous District Council, Bah Bindo Mathew Lanong ha ka Lah Sngi u la pynpaw pyrthei ba u la rai ban ai jingkyrshan ia ka Khasi Hills Democratic Front (KHDF) ba ialam da u Chief Executive Member (CEM), u Bah Pyniaid Sing Syiem.
U Bah Bindo u la shim ia kane ka rai hadien ba ki nongialam jong ka UDP kim shym la ai jubab ia ka shithi kaba u la thoh ban pynpaw ia ka mon ban iakhun ia ka elekshon Lok Sabha na Shillong Parliamentary seat.
Ha kajuh ka por, une u MDC ba la rangbah u la kyntait ba um don jingmut satia ban pyniasoh bad ka NPP namarba mynta u la long u briew uba laitluid.
“Kumba ka long mynta, ngam don jingthmu eiei ban pyniasoh bad kano kano ka party namarba nga ban kmen ha kane ka por ba nga long uba laitluid. Hynrei ngan sap hah ia ka shithi ai jingkyrshan jong nga sha ka EC ba la ialam da ka NPP ha ka sngi Baar,” la iathuh u Bah Bindo ha ka jingiakren bad ki lad pathai khubor.
U Bah Bindo u la ong ba u la rai ban thoh sha ki nongialam jong ka party ha u bnai Iaiong mynta u snem da ka jingkyrpad ban shim ia ka sienjam kaba thymmai hadien ba u la rai ban iakhun kum u kyrtong Independent na Nongkrem Constituency pyrshah ia u kyrtong ba la pynieng da ka UDP ha ka elekshon MLA kaba la long mynta u snem.
“Nga ladep phah jingthoh sha u President bad sha u General Secretary ka party ban pynpaw ba nga long uba kloi ban iakhun ia ka elekshon Lok Sabha, Hynrei ka party kam shym la ai jubab satia ia nga,” u la ong.
Shuh shuh u la pynpaw ba u la phah biang ha ka wat kaba ar ia ka shithi ha u bnai Jylliew kum ka jingpynkynmaw halor ka shithi kaba u la thoh ha u bnai Iaiong.
U la pynpaw ba kane ka jingshah leh bym kheiñ snep ha ki nongialam ka UDP ka la pynkyndit ia u namrba u President ka UDP u Bah Metbah Lyngdoh hi dalade u la kren sha ki lad pathai khubor ba u Bah Bindo u dang dei hi u dkhot jong ka UDP.
“Kaba pynlong ia u ban sngew ba ka party kam donkam shuh ia u, ka long hadien ba ngam shym la shah khot sha ka jingialang jong ka General Council,” u la ong.
Da kaba pynpaw ba kiba bun mynta hapoh ka UDP ki dei ki riewthymmai, u Bah Bindo u la ong ba um pat ju kynthih ne kylliang sha kano kano ka party naduh ba u la rung sha ka jylli jong ka saiñpyrthei bad hadien ba u la jop ia ka elekshon MDC ha u snem 1972.
“Nga la long u dkhot jong ka APHLC, HPU bad khatduh tad ynda la pynkylla sha ka UDP ha u snem 1997. Ka party ka la kylliang ia ka kyrteng, hynrei ngan iai neh beit bad kajuh ka party,”u la bynrap.
Haba kylli, hato ka rai ba un kyrshan ia ka EC ba la ialam da ka NPP ka dei neem ka jingshet kylla ia ka UDP namarba ka la ailad ba un dang iai neh ha ka shuki kum u MDC shu sieh, u Bah Bindo u la ong ba um mynjur satia ba ki nongialam kiba mynta jong ka UDP kin dei kiba don ka jingkhlieh ba un dang iai bteng kum u MDC shu sieh hapoh ka KHADC.
“Nga la shah thung kum u MDC shu sieh da ka jingmynjur jong u President barim jong ka UDP, u (L) Dr Donkupar Roy. Dei u Dr Donkupar Roy uba la ai ia nga kane ka shuki,” la ong u Bah Bindo.
