Shillong, Jymmang, 09: Hadien ba ka UPSC ka la pdiang ia ki lai tylli ki kyrteng na ka bynta ka shuki Director General of Police of Meghalaya, ka BJP Meghalaya State Unit ha ka sngi Palei ka la iakynduh ia u Myntri Rangbah ka Jylla u Conrad K. Sangma ban pynsngew ia ka jingdawa ban thung ia ka Kong Idashisha Nongrang, IPS (RR – 1992) kum ka DGP jong ka jylla.
Ha ka jingiakren bad ki lad pathai khubor, Chief Spokesperson ka BJP Bah Mariahom Kharkrang, uba dei ruh u IPS Officer ba la shongthait u la ong, ‘ka Kong Nongrang ka long kaba bit ban shimti ia kane ka kyrdan, lada kheiñ ia ka jingshakri kaba la shem napdeng ki kyrteng ba la pdiang (da ka UPSC) bad ka long ruh kaba shemphang bad kaba tbit ban shakri hapoh ka tnat Pulit.”
“Ngim shim ia kane ka sienjam bad ngi kyrmen shem ba kane ka ophisar kynthei riewlum, kaba la kha bad kaba la heh la san ha Meghalaya, ka dei ban long ka nongialam hapoh ka tnat Pulit ka Jylla namarba ka sngewthuh ia ka jingeh jong ka jylla, kaba long ka bynta kaba kongsan tam ban pyntyllun shakhmat ha ka jingtreikam jong ka tnat Pulit,” la ong u Bah Kharkrang.
