Shillong, Rymphang, 15: U Tennydard M. Marak uba dei u nongtrei monsngewbha u la dawa ïa ki bor ka aiñ ban pynshitom ïa ki ophisar jong ka DMR bad ka tnat Transport halor ka jingkynnoh ba ki ailad ban shalan be-aiñ ïa u dewiong na rilum Garo.
Ha u kyrwoh, u Marak u la ong, “ka long ka jingshisha ba ka jingtih be-aiñ bad ka jingshalan be-aiñ ïa u dewiong ka dang ïaibteng khlem kano kano ka jingpeitngor kaba wanrah ïa ka jingduhnong ïa ka jylla ïa kaba ka Sorkar Jylla, ka Ingbishar jong ka Meghalaya bad baroh ki tip shai ïa ki jingshisha hynrei na ka daw ka jingdon ki riewshim kabu ym shym la leh eiei satia.”
“Namarkata, ka long kaba donkam ban pynshitom pyrshah ïa ki ophisar jong ka DMR bad ka tnat Transport kiba peit bad pynïaid ïa ki Checkpoint bad ki Check Gate ban lap ïa ka jingkamai pisa puk puk na ki tyllong nabar khnang ban sei madan ïa ka jingpyntreikam da ka thung ïa ka jingtohkit da ka ED Departmental Enquiry/Check bad ban register case halor ka jingbym pyndep jong ki ïa ka kamram ha ka rukom badei hapoh ki kyndon jong ka aiñ khamtam kloi katba lah,” u la ong.
U la ong, ba katkum u Justice (Retied) BP Katakey, uba la thung da ka Ingbishar Meghalaya High Court ban peit ïa ka jingpyntreikam ïa ka jingbthah jong ka Supreme Court bad ka NGT, ka Sorkar Jylla ka la pyntip ba ka Supreme Court shwa ban khang ïa ka jingtih dewiong, u dewiong uba ladep tih u don 32 lak Metric Tonne.
Ka Government ka kren tang shaphang u dewiong uba don 14 lak metric tonne bad No.3232 bad namar kata dei ban tih bniah ïa u dewiong uba dang sah sa 18 lak metric tonne. Namarkata, ka paw shai ba ïa u dewiong ladep ban shalan khlem ka Challan bad ka jingjahrngai jong u dewiong ka long sa 18 Lak Metric tonn,”ong u Marak.
U Marak ha ka 30 tarik u Kyllalyngkot, u la ujor da ejahar ha ki Pulit ka Athiabari/ Porlakait Police Out Post pyrshah ïa ka jingshalan dewiong khlem ka Challan lyngba ka Checkpoint.
“Ïa u Token No. la ai hadien ba ladep siew ïa ka pisa. Ïa ka jingujor ejahar jong nga ladep phah sha Riangdo Police Station ban leh ïa kaba donkam. Hynrei haduh mynta kam pat don satia kano kano ka jingpyni kam bad namar ka jingbym kitkhia jong ki Pulit, ka la don ruh ka jingkylla ka trok kit dewiong ha ka 12 tarik Rymphang, 2024 hadien ba la ujor ïa ka ejahar ha ka 30/01/2024 hajan Athiabari Police Station halor ka jingkit palat pud ïa u dewiong kumba 1 kilomitar na Athiabari Outpost,” u la ong.
