Shillong, Jymmang, 29: Ka Voice of the People Party (VPP) ha ka Lah Sngi U Blei ka la kyntait mardor ia ka jingkhot iakren jong ka Sorkar Meghalaya Democratic Alliance (MDA) ba ialam da ka National Peoples Party (NPP) halor ka Reservation Roster System.
Dang ha ka taiew baladep, u President ka VPP u Bah Ardent Miller Basaiawmoit u la kyntait ban pdiang ia ka jingpynrung dkhot hapoh ka komiti ba la khlieh da ka Myntri Sorkar ka Dr. Ampareen Lyngdoh ban iakren sani halor ka Reservation Roster System bad pynpaw ruh ba ka VPP ka ieng beit halor ka nongrim ba ka Sorkar ka dei ban pynbeit thymmai ia ka State Reservation Policy ym ban iakren tang halor ka Roster System.
U MLA jong ka VPP u Bah Brighstarwell Marbaniang ha ka jingiakren bad ki lad pathai khubor, u la iathuh ba ka party ka la ioh pdiang ia ka shithi na ka Sorkar Jylla ha ka lah Sngi U Blei ha ka por kumba 11 baje mynstep ba la khot ia u Bah Ardent hadien ba la thung ia u kum u dkhot jong ka Komiti ban iathir iatai halor ka Reservation Roster System ba la khlieh da ka Dr. Ampareen Lyngdoh kum ka Chairperson.
“Namarba ki la shu kynthup ia ka kyrteng jong u Bah Ardent ha ka Komiti na ka liang jong ka party ha ka sngi Thohdieng ka la pynkhreh da ka shithi ban phah sha ka Sorkar ba u Bah Ardent u la kyntait war ban ia don bynta hapoh ka Komiti,” la iathuh u Bah Marbaniang.
“Ka nongrim ka jong ngi, naduh banyngkong, ngi la ong ba ngim treh ban iakren bad ka Roster System ba ia kane ka Roster System la pynshong nongrim ha ka Reservation Policy kaba mynshwa kaba noh shiliang. Dei namar kata ka daw, na ka liang jong ngi, ngi ong ngim treh ban iadon bynta ha ka Komiti,” bynrap u Bah Marbaniang.
Haba pynkynmaw ba ka VPP ka la pynrung ia ka Reservation Policy kum kawei na ki mat ha ka Election Manifesto jong ka party, u Bah Marbaniang u la ong, “ngi la leit sha ki paidbah bad ngi la ong, lada u paidbah u pynkup bor ia ngi, ngin peit bniah biang ia ka Reservation Policy.”
“U Blei U ai ia ngi saw ngut ki MLA hynrei watla katta ruh ngin ym sngap bad ngi la pyrshang ban kren ruh wat ha Ingdorbar Thawaiñ bad kumba phi la iohi, ngim shym la iohlad. Ngi la pyrshang ban phah ia ka shithi (sha ka Sorkar) ban khot ia ka Dorbar Kyrpang ban iapyrkhat bad ban iatai halor ka Reservation Policy hynrei wat kata ruh na ka liang jong ka Sorkar ka long kuman kam leh eiei ruh em. Dei namarkata ka daw ba ngin sa poi haduh une u pud,” la pynpaw u Bah Marbaniang.Halor ki 31 ngut ki MLA, u Bah Marbaniang u la ong, ka shong ha ki paidbah ban buh jingkylli ia ki. “Donkam ia ki paidbah ba kin buh jingkylli khamtam ia ki MLA jong ki seng saiñpyrthei kiba wat ha ka Manifesto ki la buh ia kane (Reservation Policy) hakhmat u paidbah ba ki ong ba kin peit bniah ia ka Reservation Policy hynrei haduh mynta kam pat don kiba wan shakhmat ban ong to ngin iatreilang ban pynurlong ia kane ka mat,” u la bynrap.
