Shillong, Jymmang, 29: U MLA jong ka Nongstoiñ Constituency u Bah Gabriel Wahlang u la kyntu ia ka Sorkar Meghalaya Democratic Alliance (MDA) ba ialam da ka National Peoples Party (NPP) ba ka dei ban peit bad ban bishar bniah biang ia ka Reservation Policy, 1972 khnang ba kan ym don kano kano ka jingktah ia ka jylla lane ka ban wanrah ia ka jingsngew iapher jaidbynriew.
Ha ka jingiakren bad ki lad pathai khubor ha ka Lah Sngi u Blei, u Bah Gabriel u la ong kum u nongmihkhmat ba la jied da ki paidbah ka Nongstoiñ constituency haba u kren ia kane ka mat, kam mut ba u kren tang na ka bynta ka Nongstoiñ Constituency hynrei u kren na ka bynta ka jaidbynriew baroh kawei.
“Ha kine ki sngi ba nga dang don ha ka Workshop ha Mahali, Chandigarh, ngi don 27 ngut ki MLA bad ngi iohi ba ki don la ka jong ka jong ka jingsngewkhia halor kane. Kam dei ba kim kwah ban kren hynrei ki don la ka jong ka jingsngew halor kane ka Reservation Policy,” ong u Bah Wahlang.
Haba pynpaw ba ka jingkren jong u halor ka ishu jong ka Reservation Policy ka dei ka jingsngew shimet, u Bah Wahlang, u la ong, “kumba ki paidbah jong ka Nongstoiñ Constituency ki la jied ia nga, bad ha kajuh ka por haba nga kren mynta ngam shym la kren tang na ka bynta ka Nongstoiñ Constituency hynrei ka jingkren jong nga ka long na ka bynta ka jylla bad na ka bynta ka jaidbynriew baroh kawei.”
U la pynpaw ruh ba ia kane ka jingkren jong u, bun ki paidbah kin sa kren, kin sa kynthoh bad kin sa kynnoh.
“Ha kaba iadei bad ka Rervation Policy, la i donkam ban peit bniah, ban bishar bniah bad ban khmih bniah ba kan long kumno na ka bynta ka jaidbynriew jong ngi,” la ong.
U la iathuh ba u la pyrkhat bad puson bha shwa ban kren eiei halor ka Reservation Policy khnang ba kan ym ialam bakla hadien ba ki la don bun ngut ki briew kiba la telephone ia u halor kane ka ishu ha kine ki khyndiat sngi.
“Ha ka por elekshon nga la kyrpad ia ki paidbah, to iarap lem ba ngan iadon ryngkat lang bad phi ha kiba bun ki bynta na ka bynta ka jingbha jong ka jaidbynriew jong ngi. Nga ngeit skhem ba U Blei u la don la ka jong ka bynta ban pynshai lem ia ngi ha kane ka Reservation Policy ba kin lah ban leh ia kaba bha tam ba ka jaidbynriew kan im bad kan ym don ha ka jingjynjar,” la bynrap u Bah Wahlang.
Da kaba kyntu ia ki paidbah kin long kiba jaijai, u Bah Wahlang, u la ong, “ailad lem ia ngi kum ki nongmihkhmat ba ngin nang ioh ban tih bniah kham jylliew shuh shuh na ka bynta ka jingbha jong kane ka kam kaba ngi la iaid. To ngin ia iaid ryngkat ryngkat bad ka jingngeit ha U Blei, ia kiei kiba ngi leh kin long na ka bynta ka jaidbynriew ka jong ngi.”
