U Dr.Andreas Dkhar u la khlad noh ha ka 27 tarik u Jymmang 2023 ha Super Care Hospital bad ia ka met kaba sah jong u la tep donburom ha ka 29 tarik u Jymmang 2023 ha Divine Savior Parish, Nongthymmai. U Dr. Andreas u la khlad katba u dang don ha ka kam jong u bad ha ka por ba u la khlad u bat kum u Additional Director Health Services in charge Civil hospital , Shillong.
Ngin ia phai khyndiat shaphang ka jingiaid lynti jong u Dr.Andreas ha ka jingim jong u. La kha ia u Dr.Andreas ha ka 25 tarik u Nohprah 1965 ha ka shnong Malki. Kum u khynnah rit u la leit skul ha Little Flower ka skul kaba don ha Malki, u la pyndep ia ka PU Science na St.Anthony’s College , Shillong ha u snem 1984 bad hadien kane u la leit ban pule ia ka MBBS ha RIMS kaba don ha nongbah Imphal jong ka jylla Manipur.
Hadien ba la pyndep ia ka jingpule MBBS, u Dr.Andreas u la trei nyngkong eh kum u doktor ha Nazareth Hospital, Shillong. Tang katto katne snem ba u trei ha Nazareth u la ioh ia ka kam sorkar , kum u nongtrei sorkar u la leit trei nyngkong eh ha ka shnong Sahsniang West Jaintia hills bad hadien kata sa sha Laitryngew ha ka thain Sohra.
Katba u dang don ha ka kam , u la bteng ruh ia ki jingpule jong u ia ka PG Medicine bad ha katei ka por u la ioh ia ka Gold Medalist. Ter ter ha ka jingtrei jong u ia ka kam, u la kiew shaduh ka kyrdan Surgeon Superintendent jong ka Civil hospital, Shillong bad ha kajuh ka por u bat ruh kum u Joint Director jong ka Health Services bad khatduh ha ka sngi ka jingiap u bat kum u Additional Director of Health Services. U Dr.Andreas u iehnoh shadien ia 3 ngut ki khun jong u kata i Dr.Ibanylla Mylliemngap iba dei i Dentist, i Dr. Wanbhanylla Mylliemngap MBBS bad I Iahunlang Mylliemngap iba dang don hapdeng ki jingpule jong i.
Ka jingkhlad u Dr.Andreas ka long shisha ka jingduh kaba khraw ia ka jylla hi baroh kawei. Ka Myntri ka tnat ka koit ka khiah ka jylla ka Dr.Ampareen Lyngdoh ka la pynpaw ka jingsngew duhnong kaba khraw halor ka jingkhlad noh jong u Dr.Andreas. U Myntri sorkar barim uba ju peit ia ka tnat ka koit ka khiah u Bah A.L Hek u la pynkynmaw ia ki por Covid ba u ju ia trei ryngkat bad u Dr.Andreas bad u la ong ba u dei shisha u shipai uba shlur ha ka thma ba ka jylla ka iakhun pyrshah ia ka khlam Covid. Nangta ngi la ioh ruh ban ia kren bad ka Dr. Lana E Lyngdoh ka State Nodal Officer National Tobacco Control Programme East Khasi Hills, ka Dr.Ailancy Kharjana ka Joint Director of Health Services kaba dei ruh mynta ka Surgeon Superintendent jong ka Civil Hospital, Shillong.
