Shillong, Nailur 15: Ka Khasi Students Union (KSU) East Jaiñtia Hills District Unit ha ka sngi thohdieng ka la kyntu ia ki ar ngut ki MLA jong ka East Jaiñtia Hills District ban kren halor ka jingjot rathai ka surok National Highway-6 ha ka Dorbar Synrai kaba la sdang mynta ka sngi.
“Ki nongmih khmat jong ka District kim dei ban sngap jar haba kat kane ka jingeh ki paidbah ki ia kynduh,” ong u kyrwoh ba la phah da u Publicity Secretary, u samla Hamewanpynhun Ryngkhlem.
“Ngi kyntu ia phi ki Nongmihkhmat baroh jong ka ïingdorbar thawain ka jylla bad khamtam ia arngut ki nongmihkhmat ka thain naduh u Bah Kyrmen Shylla uba long u MLA ka Khliehriat Constituency bad ka Kong Santa Marry Shylla kaba long ka MLA jong ka Sutnga Saipung Constituency. Ki MLA jong ngi kin hap ban kylli jingkylli na ka Sorkar lynba u Myntri ka tnat PWD u Bah Prestone Tynsong balei ka NHAI ka ioh leh mon haduh katne bad ruh ban wanrah ruh da ka Call Attention Motion ia kane ka mat ha iingdorbar thawain ka jylla khnang ba ki paidbah jong ka thain kin tip ia ka jingshisha,” ong u kyrwoh.
