Shillong, K’lyngkot, 04: Ka Bharatiya Janata Party (BJP) ha ka sngi Palei ka la kyrpad ia ka seng kieng atiar Hynniewtrep National Liberation Council (HNLC) ban pynkylla noh ia ka rai ba ka la shim ban weng noh na ka jingiakren iasuk bad ka Sorkar Pdeng lem bad ka Sorkar Jylla khnang ban pynneh pynsah ia ka shongsuk shongsaiñ ha ka jylla Meghalaya.
Ha ka jingiakren bad ki lad pathai khubor u National Vice President ka BJP u Dr Chuba Ao uba peit ruh ia ka jylla Meghalaya u la ong, “ngi kyrpad ia ki seng kieng atiar ban wan shakhmat bad ban iakren iasuk khnang ban pynneh pynsah ia ka shongsuk shongsain.”
U President jong ka BJP Meghalaya State Unit u Rikman G Momin u la ong, “ngi donkam ia ka jingsuk bad ngi kyrpad ia ka HNLC ba kan wan shakhmat ban bteng ia ka jingiakren iasuk bad ka Sorkar jylla ne bad ka Sorkar Pdeng.”
U la kyntait ruh ban kynthoh eiei la ka long neem kaba dei ba ka sorkar kan mab noh ia ki kam bymman jong ki nongialam bad ki dkhot jong ka HNLC.
Ha sngi Palei ka HNLC ka la phah ia ka shithi sha ka Ministry of Home Affairs ka Sorkar India lyngba u Advisor (MHA North East) u AK Mishra ban pyntip ba ka seng ka la weng noh na ka jingiakren iasuk halor ki san tylli ki daw kiba ka ladep ban phah sha ka Sorkar bad kawei na kita ka long ban bam noh ia baroh ki jingujor pyrshah ia ki nongialam bad ia ki dkhot ka seng.
U Chief Spokesperson jong ka BJP u Bah M Kharkrang uba dei ruh u Ophisar Pulit ba la shongthait u la ong ba ka Party ka kyndit katlah katiai ia ka jingshim rai kyndit jong ka HNLC ban weng noh ialade na ka jingiakren iasuk bad ka Sorkar
U la ong ba kam lah ban long ia ka Sorkar ban weng lut ia baroh ki mukotduma pyrshah ia ki nongialam bad ia ki dkhot jong kane ka seng kieng atiar.
“Lada phi la iohi ia ka jingpynmih khubor……ka thong jong ka HNLC ka long ban weng lut ia baroh ki mukotduma pyrshah ia ki nongialam bad ia ki dkhot jong ka seng. Nga sngew ba ki dei ban iai ap namarba kam long kaba suk ia ka Sorkar ban shu weng lut ia baroh ki mukotduma khamtam lada dei leilei ki mukotduma kiba ladep pynngat kyndon bad kiba la tian bishar ha ka kashari hadien ba ladep pynngat kyndon, baroh ka shong hi ha ka Kashari. Ban ong ba ka Sorkar kan weng lut ia ki mukotduma kam lah ban long,” u la ong.
“Ha kajuh ka por, ngi hap ban pyrkhat ruh ia ki lanot, ki lah ban dei ki bahaing hasem ne kiba dang don ka jingiadei, mynta lada ka Sorkar kan shu pynhun tang ia kawei ka liang, kaei ka jingbishar kaba hok kaba phin ai sha ki lanot jong ki kam bymman,” ula bynrap.
U Bah Kharkhrang u la ong ba ka HNLC ka la shim rai kyrkieh ban weng noh na ka jingiakren. “Ki la dei ban ailad ba ka jingiakren kan dang bteng,” u la bynrap.
Haba kylli, u Bah Kharkrang u la ong, “ngi kyrpad ia ka HNLC ba kan dang bteng ia ka jingiakren bad ka dei ka jingiapeiñ kaba phim lah ban shu dawa bad ban khmihlynti ba yn pynurlong ruh da ka Sorkar ia baroh ki jingdawa. Phi hap ban peit na baroh ki liang, bad kam mut ba tang namarba kawei ka kam kam shym la urlong kam mut ba phin shu weng noh ia ka jingiakren iasuk.”
Halor ka jingkam jong ka HNLC ba ki nongialam bahakhmat ki lah ban shah kem lada ki wan mih sha ka jingiakren, u Bah Kharkrang u la ong, ba ka Seng ka dei ban shaniah bad ngeit ha ka Sorkar namarba ba la ai ia ka jingiada.
“Lada ka Sorkar ka la mynjur ban ai jingiada, kam lah ban shukor ia ki bad ki dei ban ngeit ia ka sorkar,” u la ong.
Halor ka jingshah byrngem ba dang shen jong u MLA ka Sohra u Bah Gavin M. Mylliem ha ka HNLC halor ka jingkhang khyrdep ia ka MCCL u Bah Kharkrang u la ong, ‘ha nga shimet, nga sngew ba kam long kaba dei. Phim lah ban pynkoit ia ka jingpang jong kompeni kaba la neh da ki 30-40 snem, bad mynta phin shu teipot ha u MLA. Kata ka bym lah satia ban pdiang.
