Shillong, K’lyngkot, 05: Ka tnat Pulit ka la sdang ban pynlong ïa ka jingtohkit ban lapdien ïa ki briew kiba donkti ban tah ïa ki Notis beh mynder ha kiba bun ki dukan ha Sohra bad ha Shella.
Ha kine ki notis, la bthah ïa ki trai ri trai muluk ba kin beh noh ïa ki nongtrei mynder na kine ki ar tylli ki shnong, hynrei lym kumta kin hap pynkhreh ban shim ïa ka jingkitkhlieh lada mih kano kano ka jingjia.
Ar sngi mynshwa, la lap ba ïa kine ki notis la tah shabar jong ki dukan ha Sohra. Ha ka sngi Thohdieng, ïa kine kijuh ki notis la tah sa ha ka shnong Ichamati bad ha ka thaiñ Shella.
Ïa kine ki notis la thoh ha ka ktien Khasi ym shym la don basoi bad ym shym la pynpaw kyrteng satia la ki dei na kano kano ka kynhun.
U Superintendent of Police ka East Khasi Hills Bah Sylvester Nongtnger ha ka jingïakren bad ki lad pathai khubor u la ong ba ka jingtohkit ka la sdang ban wad ïa ki briew kiba donkti halor ka jingtah ïa kine ki notis.
“Ngi la bthah ïa u SDPO bad ïa u OC ba kin wad ïa ki briew kiba donkti ban tah ïa kine ki notis. Namarkata, ka jingtohkit halor kane ka jingjia ka la ïaid shakhmat,” u la ong.
