Shillong, Risaw, 17: Ka Khasi Students Union (KSU) East Jaiñtia Hills District Unit lyngba ka Education Cell ha ka sngi Baar ka la phah ia ka shithi sha u Regional Director jong ka National Institute of Open Schooling (NIOS) kum shi bynta ban wanrah bad pynshai sha ki paidbah halor ka sienjam jong ka Sorkar Pdeng khamtam na bynta kito ki briew kiba lah iehnoh shiteng por ia ka pule puthi na ka daw ka jingbym kot bor bad ruh na kiwei pat ki daw.
Ka seng ka don ia ka jingthmu ban pynkylla dur ia ki briew lyngba ka pule ka puthi bad ka seng ka la shim iakane ka sienjam ban iohi ia kata, ong u kyrwoh ba la phah da u Education Secretary ka Seng u Samla Emmon Chyrmang.
Ha ka dorkhas ba la phah sha u Regional Director ka NIOS ka seng ka la kyrpad ruh ban pynlong ia ka Awareness Program lane ki Roadshows kumba leh lem ha kiwei ki district bad ruh ban pynshlur ia ki paidbah ka thain ban pynrung kyrteng ha kane ka shlem ai jinghikai.
Ka seng ka khmihlynti ba ki bor ba dei peit kin ioh pdiang ia kane ka shithi ba la phah da ka seng bad ruh ban peit lem sha ka thain East Jaintia hi baroh kawei.
Ka seng kan sa phah kopi ruh ia kane ka dorkhas sha ki bor ba dei peit jong ka NIOS Shillong Centre, sha ka DSEO, sha u DC bad ruh sha ki District Mission Coordinator ka NIOS bad sha u Director of School Education and Literarcy ba kin buddien lem.
Ka seng lyngba ka dorkhas ka la dawa ruh ban buh ruh ia ki Examination Centres ha ka district khnang ba kiba iakhun ia ka eksamin ba la pynlong da ka NIOS kin kham suk ha ka leit ka wan.
