Ka Joint Action Committee jong ki sengbhalang na rilum Jaintia kiba kynthup ia ka Jaintia Students Union, ka Jaintia Youth Federation bad ka East Jaintia Council ki la phah da ka jingthoh sha u Chairman jong ka Public Hearing halor ka jingthmu ban tei ia ka shlem pynmih bording Myntdu-Leshka Hydro Electric Project Stage-II khnang ba kan pynmyntoi ia ki paidbah nongshong shnong jong ka Jylla Meghalaya.
Ha ka dorkhas ba la soi da u President ka JSU u Bah Jersom Jylla, u President ka JYF u Bah OL Tariang bad u President ka EJNC u Bah Sambormi Lyngdoh, ka Joint Action Committee (JAC) ka la ai jingmut ia ka Sorkar ba kano kano ka Agency bad ka Sorkar kin bujli ia ki jaka khlaw na West Khasi Hills District sha Jaintia Hills District namarba ki dang bun bylla ki jaka khlaw hapoh kine ki ar tylli ki district.
Ka JAC ka la kyrpad ia ka Sorkar bad ia ka Agency ban pynrung kyrteng shwa ia ki trai jylla kiba la kham tbit kum ki nongtrei ha kino kino ki kam bad ba ka jingthmu jong kane ka projek kan long beit ban aikam aijam shwa ia ki trai ri trai muluk.
Na ka bynta ki nongtrei ha ki kam kiba kham jwat (technical), ka JAC ka la kyrpad ia ka Agency ban ailad shwa da ki trai jylla bad lada ki trai jylla ki duna, ka Agency ka lah ban wanrah nabar ka jylla kiba don ia ki kot ki sla kiba biang badn ban pan jingbit na ka bynta ban aplai ia ka Labour License bad ia ka syrnot na ki bor ba dei peit.
Ka projek ka dei ban pynmyntoi khamtam eh ia ki trai jylla bda ia ki paidbah jong ka West bad ka East Jaiñtia Hills District, la ong ka JAC.
“Ngi kyntu ruh ia ka Sorkar bad ia ka Agency ban kynthup lang ia ka shnong Borghat hapoh ka Local Area Development namarba kan dei kawei na ki shnong ka ban shah ktah ynda la shna ia ka dam ha ki sngi ki ban sa wan,” la ai jingmut ka JAC.
