Shillong: Mynnin ka sngi ka 30 tarik Ïaiong, ka Lum Jingthang Committee ka Seng Khasi Kmie, ka la pyndep ia ka jingpynkhuid paidbah ia u Lum Jingthang Briew, ba don ha Jaiaw.
Kane ka jingpynkhuid ba shi sien shi snem la wan ban iashim bynta shitrhem naduh ki Rangbah, ki longkmie, longkpa, ki samla kynthei bad shynrang bad kumjuh ki khynnah rit, ha kaba ka jingpynkhuid ka long ia baroh ki sawdong ki sawkun bad ki kor shongthait ba la tei pynsah namda ki longiing longsem jong ki parakur parakha, kum ka dak ban kynmaw burom ia ki.
U Kongsan ba la wan ban don lang ha kane ka sngi dei u MLA ka North Shillong Constituency, u Bah Adelbert Nongrum, uba ha ka jingkren ka jong u ula ong ba wat lada ka jylla ka don la ki jong ki jingngeit ka riti ka dustur, ka deiti, hynrei ka kamram hi ka long ban pynneh ban pynsah ia ka. Shuh shuh u la ong ruh ba u dap da ka mynsiem kaba sngewkmen ia u Blei Nongbuh Nongthaw namar ba dei lyngba ka Seng Khasi kaba dang lah ban pynneh ban pynsah ia ki riti ki dustur bad ban pynithuh ia kane ka jaidbynriew ym tang ha kane ka ri, hynrei wat shabar jong ka ri.
U Bah Adelbert u pynpaw ruh ia ka jingsngew nguh ia ka Seng Khasi, kaba kam juh klet ba kan khot ne ban wer ia u ha man la ki kam kiba ka don, naduh ba u dang long kum u MDC, ha kaba ka jingkyrshan lem ka jong ki pat ka pynlong ia u ba mynta un da lah syndon ban kam ha ka jingim ban long haduh arsien lynter kum u MLA na kane ka Constituency.
Ha kane ka sngi pynkhuid ia u lum jingthang, ka la don shwa ka jingialang, ha kaba la ioh ia ka jingkyntiew ia ka lama ka Seng Khasi da u Rgh. O. Pyngrope, Vice President Seng Khasi Kmie, nangta ka jingpynkup burom ia u Kongsan da kaba pynspong ia u.
Hadien kane, la ioh pat ia ka nguh ka dem ka shat ka khein ka khnong ka bishar, ba la pyndep ia ka da u Chairman ka Komiti u Tymmen U San Seng Khasi Kmie u Rgh. Skor Jala, ha kaba u la sei ia ki kyntien ki nia ki jutang ban nguh ban dem ban kyrpad ban kyrpon ha U Blei Trai Kynrad ba un theh sei ia ka jingkyrkhu kaba dap miar ia baroh lang.
Ha kane ka sngi ka Lum Jingthang Committee, ka la shim ruh ia ka bynta ban sam ia ki syrnot sah kynmmaw (momento) sha ki para kur parakha kiba la wan shakhmat ban iarap ban noh ia la u synniang u bynhei sha ka komiti, bad lyngba une u synniang u bynhei, la lah ban shna bad ban pynwan dur itynnad ia une u lum kyntang ba ju pyndep ia ka lehniam ba khatduh ia ki parakur parakha ynda haba ki la khlad noh na kane ka sla pyrthei.
