Shillong, Jymmang, 29: Ka Khasi Students Union (KSU) Nongpoh Circle hapoh ka jingialam jong u President u Bah John Lyngdoh ha ka Lah Sngi U Blei kaba la ioh ujor na ki nongthep kam, ka la leit ban pynsangeh mardor ia ka personal Interview thungkam ha ka ophis District Medical and Health Officer (DM&HO) Ri Bhoi District hadien ba ki nongthep kam na kylleng ki bynta jong ka them Ri-Bhoi bad na ka jylla ki la kynnoh ba la pynmih sop sop ïa ki kyrteng jong kiba la shah jied ban ïakhun ïa ka personal Interview khlem ka jingtip jong kiwei pat ki nongthep kam watla ki don bun ngut kiba la thep kam.
Ka seng ka la kyntu ia ka ophis u DMHO ba ka dei ban ai jingpynshai halor kane ka bynta bad ban pynbeit ïa ki kynrum kynram ban pynsangeh shuwa ban pynlong ïa ka personal interview katba ym pat lah ban pynbeit ia kane ka kam.
Katkum ka Advertisement ba la pynbna da ka ophis u DM&HO Ribhoi District ki don 8 tylli ki post ba kynthup kawei ka ka post Store Keeper, 6 tylli ki post Staff Nurse (PHC/CHC) bad kawei ka post Staff Nurse (RBSK).
Ha ka jingiakren bad ki lad pathai khubor, kawei na ka samla thepkam jong ka post Staff Nurse ka la pynpaw ka jingsngewkhia ba ka ophis jong u DMHO kam shym la ai jingtip ïa ki samla thepkam bad ia ki kyrteng jong kiwei pat ki samla kiba la shah jied ban ïakhun ïa ka personal interview ym shym la pynmih wat ha ka website.
Ka la ong, “hynrei ka ophis u DMHO ka ladei ban pyntip naduh ba sdang bad dei ban pynmih da ki kyrteng, hynrei ka jingpynmih kyrteng tang 5 ngut ban ïakhun ïa ka Interview ha ka post Staff Nurse ha ophis u DMHO ka dei kaba la pynsuba sniew ïa baroh bad kam don jingmut ban pynlong Personal Interview,” bad bynrap, “na ka liang ki bor ba dei peit ki la pynshai ba ki la jied ïa ki 5 ngut ha ka personal interview lyngba ki Internal Marks bad mynta u dak jingkylli uba heh u mih ba kumno la shu jied na ka Internal Marks aiu haba khlem pat don ka jingpynïaleh eksamin.
Katkum ka jingiathuh jong kane ka samla, ha Advertisement, ka ophis u DMHO ka la pan ïa kiba la trei kum ki Staff Nurse ha ka por Covid-19 bad kiba don jingtbit kumba lai snem bad kaba sngew lyngngoh pat ka long kumno ki nongthep kam kin don lypa ka jingtbit haduh 3 snem ban trei kum ki Covid Nurse haba u Covid-19 u wan lyngshop tang kumba 1 snem ne 2 snem duna.
