Shillong, Rymphang, 10: Ha kane ka juk kyrduh kam, ki don da ki hajar hajar ngut ki khun samla ha kane ka jylla kiba shem jingeh ban ïoh kam wat hadien ba ki la pyndep ïa ki jingpule jong ki ha ki kyrdan bapher bapher.
Hynrei dang don pat ki khun samla kiba khlem da khmih lynti than ïa ki kam Sorkar, hynrei ki wad hi da kiwei ki lad ki lynti ban kamai jakpoh.
U nonglum khubor ha ka jingwad ïa ki khubor kiba kum kita, kiba phylla bad kiba kham pher, u la ïakynduh ïa kawei ka thei samla hangne ha nongbah Shillong kaba im kamai jakpoh bad pyndap ïa ka ïng ka sem da kaba trei ïa kawei na ki jait kam kaba kham ñiar ban ïohi ba ki kynthei ki kin trei.
Kane ka dei ka samla Elinda Mukhim kaba sah ha shnong Nongthymmai, Nongkhryiem kaba la pyndep ïa ka jingpule ha ka kyrdan Class XII na Morningstar College. Mynta, ka trei ha ka shlem die kali ar shaka jong ka Frank Yamaha, kum ka Mechanic, kaba, ka kamram jong ka, ka long ban pynbiang pynbit ïa ki Scooty, ki Bike, ban maramot, lane maramot ïa ki.
Ka samla Elinda ka la leit ban shah pyntbit ïa lade ha kane ka kam ha Don Bosco Technical School, Laitumkhrah haduh ar snem shiteng. Ka jingshah hikai pyntbit kam dei tang ïa ki kali ar shaka, hynrei ban shna ruh ïa ki kali saw shaka. Tangba, ka samla Elinda ka la pynleit jingmut beit ban shna tang ïa ki kali ar shaka namarba ka kham pynsuk ïa ka.
Hadien ba la pyndep ïa ka jingshah hikai pyntbit ka la trei ha Rani Motors kumba hynriew bnai eiei bad mynta la san snem eiei ka la trei bad ka Frank Yamaha.
Ha ka jingïakren bad u nonglum khubor ka samla Elinda ka la ai khublei kyrpang ïa ka Frank Yamaha kaba la plie lad plie lynti ïa ka ban trei ïa kane ka kam namarba ka dei kaba pyntbit ïalade ha ka kam shna kali ar shaka.
Lyngba kane ka samla, kan long ruh ka nuksa kaba bha na bynta ki khun samla ba lada don ka mon, ka lad ka plie, khlem da ñiew ne thew, kynthei ne shynrang ha kaba ki lah ban ïoh ïa ki kam ki jam katkum ka jingtbit ka jong ki.
