Shillong, Rymphang, 10: Ka Additional Director General, BSF (Eastern Command) Kolkata, ka Sonali Mishra ha ka sngi Thohdieng ka la wan iuhkjat sha ka Jylla Meghalaya ban leit jurip ïa ka khappud jong ka East Khasi Hills bad ka South West Khasi Hills District bad lum jingkheiñ ruh halor ki kam runar ruser kiba ju jia khah khah ha khappud ka jylla Meghalaya bad ka ri Bangladesh.
Ha ka sngi Thohdieng ïa ka Sonali Mishra la pdiang burom da u IG BSF Meghalaya u Harbax Singh Dhillon bad kiwei kiwei ki heh ophisar bad pynbud sa ka “Guard of Honour” ha Officers’ Institute, Shillong.
U IG BSF Meghalaya u la ïathuh ha ka Mishra halor ki lad jingïada ha khappud jong ka ri India bad Bangladesh ha ka bynta jong ka jylla Meghalaya.
U IG u la pyntip ruh ha ka ADG halor ki jingeh ba ki shipai BSF ki ïakynduh ha shilynter ka khappud Indo-Bangladesh bad ïathuh ruh ïa ki lad ki lynti ba ka tnat shipai ka la leh ban tem ïa ki kam runar ruser ha khappud.
Ka ADG ka la leit jngoh ruh ïa ka Composite Hospital, Shillong ban ïakynduh ïa ki shipai kiba la shah sumar ha kane ka hospital. Ka la ai jingkren ruh ïa ki ophisar bad ïa ki shipai ha ka Sainik Sammelan ha Frontier Headquarter, Umpling, Shillong.
Ha ka sngi Saitjaiñ, ka ADG ryngkat ka jingsynran lang u IG BSF Meghalaya ka la leit jngoh ïa ki ki Border Outpost (BOP) ha shilynter khappud ka India- Bangladesh kiba don ha South West Khasi Hills bad ha East Khasi Hills District jong ka Jylla Meghalaya ha kaba ka la ïakynduh markhmat ïa ki Field Commander bad pan jingtip halor ka kam pahara ha khappud khnang ban pynduna ïa ki kam runar ruser ha khappud.
Ka Mishra ka la ïakynduh ruh ïa u Rangbah Shnong bad ïa ki nongshong shnong jong ka shnong Nolikatta ha ka jingleit iuhkjat sha South West Khasi Hills.
Ka la plie paidbah ruh ïa ki building ba thymmai jong ki Border Out Pot kiba hap hapoh ka Meghalaya Frontier.
Ka ADG ka la ïaroh ïa ka jingtrei shitom bad ïa ka jinglen lade jong ki shipai BSF kiba ïada ïa ka khapud jong ka jylla Meghalaya baroh arphew kynta.
