Shillong, Lber, 26: U kyrtong ka Regional Democratic Alliance (RDA) Bah Robertjune Kharjarin ha ka sngi Baar u la ong ba dei tang ki seng saiñ pyrthei riewlum kiba lah ban kren ïa ki mat ki jura jong ki paidbah jong ka jylla ha ka rukom kaba dei.
Ha ka jingïakren bad ki lad pathai khubor hadien ba ladep thep kyrteng u Bah Kharjahrin u la ong ba un sa kren ïa ka mat ba ïadei bad ka jingdawa ban pyntreikam ïa ka Inner Line Permit, ka jingpynrung ïa ka Ktien Khasi-Garo ha ka Khyrnit Baphra jong ka riti synshar ka Ri India, ka jingpynkhlaiñ ïa ka jingpahara ha shilynter ka khappud India-Bangla bad ha khappud ka Meghalaya-Assam bad kiwei kiwei de ki mat kiba hakhmat eh jong ka jaidbynriew.
U Bah Kharjarin u la ong ba ka UDP kaba la ïatreilang bad ka Hill State People Democratic Party ka la ïoh bun ka vote ha ka elekshon Lok sabha ba ladep ha rilum Khasi. U la pynkynmaw bad pynpaw ruh ka jingkyrmen ba kane kan urlong biang mynta ka kynti khnang ba un ïoh ïa ka jingjop.
Ha kaba ïadei bad ka jingshim rai jong ka BJP ban kyrshan ïa ka NPP, u Bah Kharjahrin u la ong, “ngin kren beit da kaba shai, ki la ïatreilang ha Parliament la bun snem, ki la kyrshan lang ïa ka CAB, ki la leh lang bun ki kam, bad ngam sngew phylla ruh ba kin don ka jingïatreilang. Ai ba ki paidbah kin sa shim rai halor kata.
