Shillong, Nohprah, 08: U nongbishar jong ka kashari District Council Court ka Khasi Hills Autonomous District Council (KHADC) dang shen u la lap ba la soi tuh ïa ka jingsoi jong u Magistrate.
Ha ka jingïakren bad ki lad pathai khubor ha ka Lah Sngi u Blei ka Secretary jong ka District Council Court Bar Association (DCCBA) ka Kong Saphira Marbaniang ka la ong, “ha kine ki khyndiat sngi, u nongbishar u la lap ba ki don ki briew kiba la pyrshang ban soi tuh ïa ka jingsoi jong u Magistrate bad ka Executive Committee jong ka KHADC ka la ujor da ka ejahar sha ki Pulit ban ïohkem ïa kiba donkti.”
“Ha ka jingtohkit la lap ïa kita ki briew, ki ong ba ka don ka link bad ki Cyber Cafe ba ki leit phah shon ïa ki (dulir). Ngim kwah ban pynpaw kyrteng ïa kita, ai ba ka aiñ kan leh ïa kaba donkam baroh,” ka la ong.
“Ngi wan hangne ban ai ka jingmaham ïa ki briew ba lada ka don kano kano ka jingjia lane ki donkam ïa ki nongïasaidaiñ ki dei ban wan hi sha ki nongïasaidaiñ hynrei kim dei ban leit sha ki Agent namarba ngi la lap ba ki bun bha kiba wan sha ngi ki pynpaw ba kito ki briew ki dei kiba duk bad ngi la ïarap hynrei kito hi ki Agent kiba wan ïalam ki oh pat da ka dor kaba heh,” ka la ong.
“Ngi kwah ban ong ruh ïa ki Common Stop Centre ba ki ju buh ïa ki Advertisement kiba ong, “Affidavit done here’ bad sa kiwei kiwei ki jingpyntip kiba ïahap bad ki kam aiñ kaba ngi trei. Katkum ka aiñ kam shah ba ngin pynbna paidbah bad lada ngi leh kumta ka long kaba beaiñ,” la ong shuh shuh ka Kong Marbaniang da kaba pyntip ba ka long pyrshah ïa ki kyndon jong ka Advocate Act.
“Ban long ki nongïasaid aiñ ngi hap ban da pule bad ban ïoh ïa ka laisen. Kane ka dei ka jingmaham ïa ki paidbah bad lada ka dang jia eiei hadien habud ngin hap ban ïaid beit da ka lynti jong ka aiñ,” la maham ka Secretary jong ka DCCBA.
Haba kylli, ka la ïathuh ba u nongbishar u la lap ïa ka jingsoi thok ka dei hadien ba kawei ka longkmie ka la kyrpad ban pynbeit ïa ka jingbakla ha ka Birth Certificate. “Ynda u nongbishar u la pan ïa ka hukum kaba la pynmih mynshwa bad ynda la peit ïa kata ka hukum la lap ba ka jingsoi kyrteng kam dei ka jong kino kino ki Magistrate,” la ïathuh ka Kong Marbaniang.
“Dei ynda la khot ïa ita i kong i la ïathuh ba i ju leit ha uwei u briew uba ju pynleh ïa ki syrnot sngikha, ki syrnot sngi ïap bad kiwei kiwei ki kot ki sla. Ynda la khot ïa uta u briew um dei u nongsaidaiñ hynrei u dei tang u riewpaidbah u bym don laisen,” la ïathuh i Kong Marbaniang.
Ka la pynshai ruh ba ïa ki riewpaidbah ka aiñ kam shah ba kin leh ïa ki syrnot sngi kha, syrnot sngi ïap, ki Sale Deed ne kino kino ki dulir namarba kane ka dei ka kam jong ki nongsaidaiñ kiba la don ïa ka laisen.
Ka la pyntip ba ka Association ka la ïakren ruh bad ka Deputy Commissioner ban thoh sha ki Common Stop Centre ba kin sangeh noh mardor ban shon ïa ki dulir. “Hynrei ki dang don pat ki dukan kiba dang leh ïa kane, da lade ruh ngi ïohi ba ki dang don ha Mawlai, ha Laban, ha Lachaumiere bad kiwei kiwei ki jaka,” ka la ong shuh shuh.
