Shillong, ïaïong 18: U Chief Electoral Officer (CEO) ka Jylla u BDR Tiwari u la wer ia ki nongshong shnong ka Jylla Meghalaya ba kin mih paidbah lashai ka sngi Thohdieng ban leit sha ki Polling Station na ka bynta ban pyndep ia ka la jong ka kamram jied nongmihkhmat ha ka elekshon Lok Sabha, 2024.
Ka jingthep vote, kan sdang naduh ka por 7:0-0 baje mynstep haduh ka por 4:00 baje janmiet.
Ha ka jingiakren bad ki lad pathai khubor u Dr. Tiwari u la pyntip ba hapoh Meghalaya ki don ar tylli ki Seat, kata, ka Shillong Seat kaba don haduh 36 tylli ki Constituency bad ka Tura Seat kaba don 24 tylli ki Constituency.
U CEO u la pyntip ba ki kyrtong kiba iakhun ha kane ka kynti ki don baroh shi phew ngut, hynriew ngut na Shillong Seat bad 4 ngut na Tura Seat.
Ha Shillong Seat ki kyrtong kiba aireng ki long u Sitting MP ka Congress Bah Vincent H. Pala u ban iakhun na ka bynta ban shah jied biang ha ka sien kaba saw hadien ba u la mihkhmat kum u MP naduh u snem 2009. Kiwei pat ki kyrtong ki long ka Dr. Ampareen Lyngdoh kaba long ka Myntri jong ka Sorkar Jylla ka ban iakhun na ka National Peoples Party (NPP), u Dr. Ricky AJ Syngkon na ka Voice of the Poeple Party (VPP), u Bah Robert June Kharjahrin na ka Regional Democratic Alliance (RDA). Katba arngut ki kyrtong shimet ki long u Prof. Lakhon Kma bad u Bah Peter Challam.
Na Tura, ki kyrtong ki ban aireng ki long ka Agatha K. Sangma kaba long ka Sitting MP jong ka NPP ba mynta ka Tura. Ki saw ngut kiwei pat ki long u Saleng A. Sangma uba iakhun na ka Congress, u Zenith Sangma na ka All India Trinamool Congress (AITC) bad u Labenn Ch. Marak.
Katkum ka jingai jingkheiñ jong ka Election Commission of India, ki nongthep vote ha Meghalaya ki don baroh 22,26,567 lak ngut. Ha Shillong Seat, ki nongthep vote ki don 14,00,411 lak ngut. Ki shynrang ki don 6,837,66 lak ngut, ki kynthei ki don 7,16643. Ki Service Voter ki don 2481 ngut.
Ha Tura Seat, ki nongthep vote ki don 8,26,156 lak ngut. Ki shynrang ki don 4,157,51 lak ngut, ki kynthei ki don 4,10404 lak ngut.
Ki Trangender ki don lai ngut, arngut na Shillong Seat bad iwei na Tura Seat.
Haba khein lang ia ki nong thep vote shynrang ha ka jylla Meghalaya ki don baroh 10,99,517 lak ngut bad ki kynthei ki don 11,27,047 lak ngut.
