Shillong, Jylliew 06: U MP ba thymmai ka Tura Parliamentary Constituency u Saleng A. Sangma na ka Indian National Congress (INC) ha ka sngi Palei u la leit ban ïakynduh ïa u President jong ka All India Congress Committee (AICC) u Mallikarjun Kharge ha nongbah Delhi ban ai khublei ïa u.
Ha ka jingïaid lynti rta ha ka saiñ pyrthei u Saleng A Sangma uba la kynjoh mynta la 45 snem u la jop nyngkong ïa ka ilekshon MLA ha u snem 2008 na ka Congress na Dalamgiri, ka Constiuency barim.
Ha ka ilekshon 2013 u la shah pynduh tiket bad u la ïakhun kum u kyrtong shimet bad u la jop biang kum u MLA Gambegre, ha u snem 2018 u la jop biang kum u MLA na ka Nationalist Congress Party (NCP) bad u snem 2023, hadien ba kam don shuh ka NCP ha Meghalaya u la pynïasoh biang bad ka party Congress.
Ha kane ka MLA ilekshon 2023, ha Garo Hills la jop sa tang ma u marwei kum u MLA na ka party Congress, kum ka party ka la pynïeng ïa u kum u kyrtong MP ban ïakhun na Tura Parliamentary Seat bad ha kane ka jngïakhun u la pynrem ïa ka Agatha K Sangma kaba long ka Sitting MP ba la mihkhmat la lai sien kynthih ia ka Tura.
