Ka Estimate Committee, Meghalaya Legislative Assembly, hapoh ka jingialam jong u MLA ka Nongpoh u Bah Mayralborn Syiem kum u Chairman, ha ryngkat ka jingiadonlang ki dkhot jong kane ka Estimate Committee kata u Bah bah Charles Marngar, u Remingtone G Momin, Limison Sangma, ka Mianmi D Shira ryngkat ki nongtrei jong ka Assembly, ki la leit jngoh ia kawei na ki skul sorkar kata ka Rajkiya Pratibha Vikas Vidyalaya, kaba don ha Nai Basti, Kishan Ganj, New Delhi, ka jingleit jngoh ia kane ka skul ka long ban sakhi da la ki jong ki khmat ia ka rukom pyniaid ia ki skul sorkar ha kane ka Nongbah.
Katei ka komiti ka la lap ba ki skul sorkar ha Delhi ki long kiba la bit la biang bha , ki don naduh ki Digital Classroom, ki CCTV , ki Laptop, ki Library bad ki don ruh ki School Health Clinic, ki don haduh 20 tylli ki School Clinic haduh mynta. Kawei ka clinic ka don iwei i ANM, iwei Psychologist, iwei i MTW, bad uwei u Doctor, na bynta 5 tylli ki School Clinic.
Ha kane kajuh ka sngi, kane ka Committee ka la ioh ban leit jngoh ruh ia ka Mohalla Clinic. Ka Sorkar Delhi ka la dep ban buh haduh 521 tylli ki Mohalla Clinic. Kine ki Clinic pat ki dei na ka bynta ki paitbah nongshong shnong bad ki long ïing kiba duk, khlem siew dor eiei. Ha kine ki clinic ki ai ei ia ki dawai, ki blood test, ultra sound, ex-ray bad kiwei kiwei, bad na ka bynta ki jingshitom kiba kham eh, ki Doctor na kine ki Mohalla Clinic ki phah ia ki sha ki Hospital. Ha kine ki clinic ki don ki Doctor, ki Nurse, bad ki Pharmacist.
