Ka Khasi Students’ Union, Laban Circle ka la leit ujor bad pynkynmaw sa shisien biang halor ka jingsahteng ban weng ia ki bar jylla ba ri masi be-aiñ ha Maxwelton Estate bad ha Lower Lumparing. Ka KSU ka la pynpaw ia ka jingbitar halor ka jingslem ki bor pyniaid ban weng ia kine ki bar jylla.
Kine ki bar jylla kiba ri masi ha kine ki jaka kim shym don ia kino kino ki kot ki sla kiba biang bad ha kajuh ka por kine ki jaka ki hap hapoh ka Municipal area bad ym lah ban ri kino kino ki jingri. Ka jingdon jong kine ki bar jylla ha kine ki jaka ka pynjaboh ia ka mariang namar ki pyntuid ia ka jaboh sha ki nala bad sha ka wah. Bad ka jingsma kaba mih na kane ka jaka ka don jingma ia ka koit ka khiah jong ki paidbah, ong ka kyrwoh na ka KSU.
Shuh shuh ka KSU ka la ong ba lada ki bor pyniaid ki dang pynslem ban kyndang ia ki, kan sa shim hi la ki jong ki sienjam ban weng ia kitei ki bar jylla. Ka kyrwoh ka la ong ba ka KSU kam kwah ba ka Maxwelton Estate ruh kan long kum ka Them Metor namar ba katba nangiaid ki sngi ki nangbun ki bar jylla kiba wan buhai shnong be-ain. Ka KSU ka la pyntip ruh ba ka Shillong Municipal Board ka la jubab ba ka la dep ban leit peit ia katei ka jaka bad shen kin sa pynmih ia ka hukum ban weng noh ia ki briew kiba ri masi be-ain ha ki jaka jong ka.
