Shillong, Lber, 16: Ka Meghalaya BJP Kissan Morcha ba la lamkhmat da u Bah Ralden Bryan Shabong bad u Bah Durut Majaw, ki la pynlong ia ka jingai jinghikai ha ka shnong Markasa, West Khasi Hills District bad sam ruh ia ki sSymbai jhur bad ki tiar kynshait sha ki nongrep.
Ia kane ka jinghikai la pynlong khnang ban pyni, ban hikai, ban btin lynti bad ban pyntbit ia ki ha ka rukom rep jong ka juk ba mynta kaba lah ban iarap bad pynmih bun ki jingseisoh ba bun shah, ba pynduna ruh ia ka jingduhnong bad ka jinglehnohei bad pyniohnong kham bun ha ka liang ka rep ka riang jong kane ka shnong. Ia kane ka jingai jinghikai la pynlong ha ryngkat ka jingiatreilang bad ka Central Government Institute and Agriculture Scientists (CGIAS) da ka jingkyrshan jong ka C.R.Projects bad ka Suraksha Medical Team.
Da kane ka jingai jinghikai la shim ruh ia ki jingai jingmut na ki nongshong shnong jong kane ka thaiñ ia ka rukom synshar khadar kaba dei ruh ka mat treikam jong ka seng BJP kaba thmu ban lum bad ban wad bniah ia ki lad ki lynti na baroh ki bynta jong ka ri India ban pynmih ki rukom treikam rukom pyniaid kam ba pynhun ia ka jingkwah bad jingkhmih lynti jong ki paid nongshong shnong.
Shwa ban pynsdang ia kane ka jingai jinghikai ka Meghalaya BJP Kissan Morcha ka la pynlong ia ka jingai jingsumar ei na ka bynta ki khynnah kiba hapoh ka rta kaba 15 snem ha ka shnong Umsaw bad la sam ruh ia ki khusnam sha ki nongjop bad la sam ruh ia ki sopti jersey.
U Bah Shabong haba kren ha kane ka jingialang u la ong, “kine ki jingpynlong bad jingai jinghiai jong ngi ki long kum shibynta katkum ka mat treikam jong u Myntri Rangbahduh ka ri uba iai trei shitrhem na ka bynta ka jingiaid shaphrang ka kam jong ki nongrep ha kylleng ka ri India.”
