Shillong, Jylliew, 10: Uwei u rangbah Garo ia uba la tip kyrteng kum u Tripash Sangma uba shong basah ha 12 mer Jorabad, Ri-Bhoi District u la duh ia la ka jong ka jingim hadien ba u la shah iuh ha ka trok ha Lad Umroi ha ka Lah Sngi u Blei ha ka por kumba 9:00 baje mynstep.
Katkum ka jingtip ba la iohlum, la iathuh ba u Tripash Sangma u la mih na la ing da ka Scooty kaba don ïa u number AS01-EA7149 bad la u jong u khun uba la tip kyrteng kum u Master Moncembirth Marak ban leit shim ia ka Migration Certificate, hynrei ynda poi ha Lad Umroi u la iakynduh pynban ia ka jingjia kaba sngewsih hadien ba ka trok kaba don ïa u number NL01-AB-9291 ba la ñiah da u Sunil Kumar Jha na Kamrup Assam ka la tynrah ïa ka Scooty bad iuh ïa u Tripash Sangma haduh ba ka met kan da lwet katba u khun pat u la mynsaw jur ha kane ka jingjia.
Ia une u khun uba la mynsaw la pynkit noh sha Umsning CHC bad ki Pulit ki la rah noh ia ka met jong u Tripash Sangma sha Civil Hospital Nongpoh na ka bynta ban leh ïa ka Post Mortem. Ka jingtohkit halor kane ka jingjia ka la ïaid shakhmat.
