Shillong, Jylliew, 10: Da ki spah ngut ki paidbah nongshong shnong jong ka thain Umden, Ribhoi District ha ka Lah Sngi u Blei ki la wan poi kyndit ha ka jaka shah thngan jong ka Kong Bindas Syiem ha Parking Lot kaba don markhap bad ka Ophis Additional Secretatiat, Shillong ban pynrem jur ia ka Sorkar MDA namarba ka jingleh matlah ha kaba iadei bad ka jingjot rathai jong ka surok Nongpoh-Umden-Sonapur.
La sakhi ba ki paidbah ka thain Umden kiba la wan poi kynsan ha kane ka jaka ki la rah ruh da ki plakad ban pyrta shla da ki sur ba pynrem ia ka Sorkar ba la ialam da ka National Peoples Party (NPP), ia u Myntri Rangbah ka Jylla u Conrad Sangma, ia u Symbud Myntri Rangbah u Bah Prestone Tynsong bad ia u Superintendent of Police ka East Khasi Hills u Ritu Raj Ravi halor ka jingthombor ia ka jaka shah thngan ka kong Bindas ha miet 9 tarik mynta u bnai.
U Chairman ka Synjuk ki Rangbah Shnong Raid Nongtluh Bah Matthias Syiem ha ka jingiakren bad ki lad pathai khubor u la ong ba ka jingwan paidbah sha Shillong ban ai jingkyrshan ia ka Kong Binda ka dei ka rai kaba la shim ha ka jingialang kaba la long ha madan Mathana ba la pynlong da ka Nongtluh Mathan Development Forum (NMDF) ryngkat ka Synjuk ki Rangbah Shnong Raid Nongtluh.
Haba kylli u la iathuh ba ki paidbah kiba iashim bynta ha kane ka jingwan kiew sha nongbah Shillong ki dei na ki 100 tylli ki shnong jong ka thain Umden.
U la ong ruh ba lada ka kam ka dawa, ki nongialam jong ka Synjuk bad ki paidbah ka thaiñ Umden ki lah ban synran da kaba shong shah thngan lang bad ka Kong Bindas ha nongbah Shillong.
