Shillong, Jylliew, 10: U MLA jong ka Mawhati Constituency Bah Charles Marngar uba dei u ha ka Lah Sngi u Blei u la leit jngoh ia ka Kong Bindas Syiem, ka nongshong shnong jong ka shnong Mawlong Nongtluh, Ribhoi District kaba dang bteng ia ka jingshah thngan kaba khlem pud sngi ha Parking Lot kaba don markhap bad ka ophis Additional Secretariat, ha Shillong.
Ka Kong Bindas Syiem ka la sdang ia ka jingshah thngan ba khlem pud sngi naduh ka por 12:30 baje mynsngi ka 6 tarik mynta u bnai ban pyrshah ia ka jingbym shna pynbha ka Sorkar ia ka surok Nongpoh-Umden-Sonapur kaba la pynsuhsat haduh katta katta ia ka leit ka wan jong ki paidbah ha ka leit ka wan, ha ka rah ka rong bad khamtam eh ia ki bapang ba shitom.
Ha ka jingiakren bad ki lad pathai khubor u Bah Charles Marngar u la ong ba u Symbud Myntri Rangbah ka Jylla u Bah Prestone Tynsong uba khmih ia ka tnat PWD (Roads) da lade hi u la kren ban shna pynbha noh ia ka surok Nongpoh-Umden-Sonapur hynrei haduh mynta kane ka jingkular ka shu sahteng khlem da poi shaei shaei ruh.
U la iathuh ba ka jingslem ban wan jngoh ia ka Kong Bindas ka long namarba u bunkam ha kaba iadei bad ka jingwanrah ia ka met jong ki arngut ki nongbylla tih dewiong na Ribhoi kiba la khladnoh ha ka jingtwa khyndew ha ka krem tih dewiong ha Tinsukia Assam.
“Kum uwei na ki nongmihkhmat na Ribhoi ngam lah ban shu sngap, namar ban shim kata ia kane ka rai ban shong shah thngan kam dei ka kam kaba suk,” u la ong bad bynrap ba ka jingshah thngan ka Kong Bindas ka dei ka rai rangbah ym tang na ka bynta ialade hynrei na ka bynta ki paidbah babun balang jong ka them Ribhoi.
Haba kylli, u la ong, “ka don ka jingkthang mynsiem kumba long ine i kong lada ki jingkular kim long kam namarba na ka liang jong u Myntri uba peit ia ka tnat PWD u la kren bad pynbang hi da lade, hynrei katkum ka jinglap ka jingshem pat kam long kam.”
“Ia ka jingsahdien ngim lah ban len jong kane ka surok da ki phew snem ba ngin iakren tang hapoh ka Nongpoh Constituency, hynrei wat ha ka Constituency jong nga (Mawhati Constituency) peit ka surok Mawrong ka jingjot ka bym long shuh ban iakren. Naduh ki bnai tlang ki la kular ban leh, hynrei haduh mynta kim pat leh eiei. Ka surok Umtrai, u Myntri ba peit ia ka tnat PWD ha u snem baladep u la phah ia u Engineer bad la leh nadong shadong la thew la woh bad la leh ia ka Estimate hynrei haduh mynta ym pat leh eiei. Dang ha kine ki khyndiat sngi, ki paidbah ha ka Constituency jong nga, ki phah ia ki dur ki dar ba ki kali ki kylla khongpong,” la iathuh u Bah Marngar.
“Ia ki jingdonkam hapoh ka Constituency ngi ladep pynsngew sha ka Sorkar, hynrei ban jubab ia kane lehse kaei ka jingeh jong ka sorkar lada dei ia ka surok ngi kwah ba ka tnat PWD kan jubab bad kiwei kiwei ki tnat ruh kin jubab. Lada iakren, ki jingkular ha ka por elekshon ki jingkular kiba heh bad kiba khraw hynrei hadien ka elekshon kham niar ban iohi ban jia ia kaei kaba la kular,” u la ong.
