Shillong, Nailar 25: Ka Khun Hynñiewtrep National Awakening Movement (KHNAM) ka la pynpaw ïa ka jingsngew lyngngoh halor ka jing bym pynrung ïa uwei ruh u trai jylla, kata, napdeng ki Khasi bad Garo, ha ka Expert Committe ban khmih bniah ïa ka State Reservation Policy.
“Ngi sngewlyngoh ruh ba tang uwei ruh u Khasi/Garo kim don ha kane ka Committee bad kumba paw baroh hi ki dei ki bar jylla. Ngi la khmihlynti ba ki jong ngi ruh kiba sngewthuh bha ïa ka Reservation Policy bad ïa ki 51 tylli ki lynti ïaid jong ka kin don lang ha kane ka Committee,” ong ka KHNAM ha u kyrwoh ba la phah sha ki lad pathai khubor lyngba u Vice President Bah Thomas Passah.
“Ngi sngewlyngngoh ruh bad khlem buh ïa kane ka Committee ban pyndep ka ki kam baroh. Haduh mynta ngi ïohi ba ka Sorkar ka don ïa ka jingsheptieng ym ïa ka jingshimkhia ha kaba ïadei bad ka jingdawa ban pynkylla noh ïa ka Reservation Policy,” la ong u kyrwoh.
“Ka Sorkar mynta ka sngi ka la thaw ïa ka Expert Committee ban pule ïa ka State Reservation Policy bad ki dkhot jong kane ka Committee baroh ki dei lut ki bar jylla. Ka KHNAM ka pynpaw ïa ka jingbymïahap halor ka jingpyndonkam jong ka Sorkar ïa ka kyntien “STUDY RESERVATION POLICY” lane kaba mut kane ka Committee kan shu pule ïa ka Reservation Policy bad kan shu phah pat sha ka Sorkar ïa kaei kaba ki la pule bad shem,” la ong shuh shuh ka KHNAM.
“Na ka liang ka KHNAM ha ka jingïalang jong ki seng saiñpyrthei kaba la long ngi la pynpaw ïa ka jingpyrshah ïa ka jingthaw ïa ka Expert Committee namarba ngi sheptieng ïoh ka shu pynslem ïa ka por, hynrei haba baroh ki la kwah da ka Expert Committee bad ka jingkwah jong kiba bun paid ka ieng. Ka rai hi ha kane ka jingïalang ka long ban pynkylla ïa ka Reservation Policy ym ban pule ïa ka. Na kata ka daw ngi shem ba kane ka Committee ka la ïaidlait na kaei kaba la ïa rai ha ka jingïalang,” la bynrap shuh shuh u kyrwoh.
