Shillong, Kyllalyngkot, 17: Ka Khasi Students Union (KSU) Ranikor Circle ha ka sngi Balang ka la maham ïa ki paidbah na kiwei ki distrik kiba thmu ban leit ïashim bynta ha ka Beach Festival harud ka Wah Kynshi ha ka shnong Ranikor ka ban sa long ha 19 tarik bad 20 tarik mynta u bnai ïa kaba la pynlong da ka tnat Jngohkai Pyrthei ka Sorkar Jylla, ba kim dei satia ban dih ne ban sum hapoh kane ka wah kaba tuid arsut lyngba ka shnong Ranikor.
Ha ka jingïakren bad ki lad pathai khubor u President ka KSU Ranikor Circle, u samla Marconi Thongni u la kam ba bun ki briew ki bashong basah ha ka thaiñ Ranikor ki ngat ha ka jingpang Cancer bad u la ong ruh ba ka seng ka suba ba ka lah ban dei na ka jingjaboh jong ka wah Kynshi ha ka thaiñ Ranikor kaba ki nongshong shnong ki ju pyndonkam ban sum, ban dih bad ban bam ruh ïa ki dohkha kiba im hapoh kane ka wah.
U la pynkynmaw ruh ba ha u snem 2010, ka shnong Ranikor ka la sakhi ïa ka jingïap them jong ki dohkha dohum hapoh ka Wah Kynshi ha ka shnong Ranikor bad ong ruh ba mynta kane ka wah kam don shuh wat tang kawei ruh ka dohkha kaba lah ban im namar ka jingjaboh jong ka wah ka la long shaba palat.
U la ïathuh ba ka seng ka ladep ujor sha ka Sorkar halor ka jingkylla rong jyrngam jong ka Wah Kynshi hynrei kaba sngewsih ka long ba ka ophis jong ka Meghalaya State Pollution Control Board (MSBCP) kaba la leh test ïa ka um kam shym la pynmih paidbah satia ïa ka kaiphod la ka um ka long neem kaba bit ïa ki paidbah ban dih, bad ban sum ban sait.
Ha kajuh ka por, ka seng ka la kyrpad ïa ka Sorkar Jylla ban shna pynbha noh ïa ka surok kaba pynïasoh naduh ka shnong Mawsynram shaduh ka shnong Laitumsaw kaba la jot rathai haduh katta katta bad kaba la buh jingeh ïa ki paidbah ha ka leit ka wan bad ha ka rah ka rong.
U samla Marconi u la ong, “lada ka Sorkar ka bun pisa ban pynlut na ka bynta ban pynlong ïa ki tamasa ka dei ruh ban pynlut pisa na ka bynta ban shna pynbha ïa kane ka surok kaba hap hapoh ka tnat PWD Mawsynram Division kaba la pynsyrtok haduh katta katta ïa ki paidbah nongleit nongwan.”
