Shillong, Nailur 13: U National President ka National Peoples’ Party (NPP) u Conrad Kongkal Sangma uba long ruh u Myntri Rangbah ka Jylla ha ka sngi balang u la bthah ïa ki nongïalam ban pynkhlaiñ ïa ka party shwa ban poi ka elekshon Lok Sabha.
U Sangma u la pynmih ïa kane ka jingbthah ha ka jingpynrung dkhot ïa u MLA barim ka Mawsynram u Bah Himalaya M Shangpliang, uba la mih noh dang shen na ka Bharatiya Janata Party (BJP) ha ryngkat ka jingsakhi lang jong ki nongïalam ka party ba kynthup ïa u Bah Prestone Tynsong bad u Bah Sniawbhalang Dhar u Chief Adviser jong ka Sorkar u Bah D.D. Lapang.
Haba pdiang sngewbha ïa u Bah Shangpliang sha ka NPP, u Sangma u la ong, “nga kyrmen ba ngin sa lah ban ïoh jingmyntoi shikatdei eh na ka jingwan pynïasoh u Bah Shangpliang kum u nongïalam bad ki nongkyrshan jong u, kan pynkhlaiñ shuh shuh ïa ka party.”
U Myntri Rangbah u la ïaroh ruh ïa u Bah Shangpliang kum u ophisar ba la shongthait uba la don bun ki jingtbit bad kum u MLA barim uba la noh synñiang shikatdei eh hapoh ka Ingdorbar Thawaiñ ka Jylla.
Da kaba kyntu ïa ki nongkyrshan ban pynkhlaiñ ïa ka party u Sangma u la ong, “kum u National President, nga kwah ban kyntu ïa u State President ban pynkhlaiñ ïa ka party ha ki Unit, ki Block, ki Committee bad kiwei kiwei ki tnat treikam.”
“Ngi don mynta sa tang hynriew bnai bad ka ladei ka por ban trei shitom. Ngi dei ban pynkhlaiñ ïa ka party,” u la bynrap.
Shwa kane, u Bah Shangpliang u la ong ba ka jingpynïasoh jong u sha ka NPP ka dei namarba ka Meghalaya ka la nang kiew irat kum ka jylla ha ka ri hapoh ka jingïalam jong u Conrad K Sangma.
Mynta ka sngi, nga kular ban trei na ka bynta ka party da ka jingkhuid bad ka jingleh hok bad ban shakri ïa ki paidbah jong ka jylla katkum ka jingkotbor ka jong nga, u la ong.
U la ïathuh ba palat lai hajar ngut ki dkhot ki la mih noh na ka BJP bad ban pynïasoh bad ka NPP ha Mawsynram ha ka sngi baar.
