Shillong, Nailur 13 : Ka tnat ka Koit ka Khiah ka Sorkar Jylla ha ka 8 tarik mynta u bnai ka la mynjur ban shna ia ka Health Sub-Centre ha ka shnong Jyllep bad ha ka shnong Mawhiang kiba hap hapoh ka Mawsynram C&RD Block.
Kane ka jingshimkhia jong ka tnat ka Koit ka Khiah ka Sorkar Jylla ka dei hadien ka jingiakynduh jong ka seng ia ka Myntri ka Koit ka Khiah ka Dr. Ampareen Lyngdoh ha ka 26 tarik, Iaiong, 2023 da kaba pynsngew ruh ia kiba bun ki mat jingdawa nalor ka jingpynsngew ban shna noh ia ka Health Sub Centre ha ka shnong Jyllep bad ha ka shnong Mawhiang.
Ka Khasi Students Union (KSU), South West Khasi Hills District ha u kyrwoh ba la phah sha ki lad pathai khubor lyngba u President u samla Forwardman Nongrem, ka la pynpaw ia ka jingsngewnguh bad ka jingai khublei ia ka tnat ka Koit ka Khiah jong ka Sorkar Jylla bad khamtam eh ia ka Myntri ka Koit ka Khiah ka Dr. Ampareen Lyngdoh kaba la shimkhia ban sngap ia ka jingeh ba ki paitbah ka thain ki iakynduh jingeh.
“Ka seng ka sngewkmen shikatdei eh hadien ba ngi la ioh jingtip ba ka tnad ka Koit ka khiah jong ka sorkar jylla ba la khlieh da ka Dr. Ampareen ha ka 8 tarik mynta u bnai ki la mynjur ban phah shna noh ia kine ki artylli ki Health Sub Centre. Kum ka seng, ngi khmihlynti ba ka Sorkar kan pyndep noh kham kloi ia ki jingdonkam ban phah shna noh ia kine ki Sub Centre khnang ba kan long ka jingmyntoi ia ki paitbah jong kine ki ar tylli ki shnong bad ki shnong kiba marjan,” ong u kyrwoh.
Ka Seng ka kyntu ruh ia ka Myntri ka Koit ka Khiah ban jurip lem ia ki CHC bad ia ki PHC kiba don ha South West Khasi Hills District bad ha Mawsynram. Ngi kyntu ia ka Myntri ban jurip kyrkieh khamtam ia ka Civil Hospital ne ka 100 Bedded CHC kaba don ha Mawkyrwat khnang ban lap ia ki jingduna hapoh kane ka Hospital naba ka seng ka ladep pynpaw teng ia ki jingduna ha kane ka hospital kum ka jingduna ki doktor, ki specialist bad kiwei kiwei ki post ba donkam.
