Tura, K’lyngkot 19: Ka 5th Meghalaya Games 2024 ka la lah ban sei ia ki rang bad ki thei kiba snar kiba la iakhun ha ka Weightlifting bad ha kane ka jinglehkai ki nonglehkai ki la wan poi na kylleng ki district ban iakhun ban rah ia ka namjop.
Ka Ri Bhoi ka la sei ia ki nongjop ha ka jingiakhun da kaba khur haduh hynriew tylli ki takma ksiar katba ka East Khasi Hills, West Garo Hills, bad South-West Khasi Hills ki la ioh mar kawei ka takma ksiar.
Ka Ri Bhoi ka la long ka lahduh ha ka Weightlifting, da kaba khur 6 tylli ki takma ksiar ha kaba na ka liang ki shynrang kiba iakhun ha ka 73 kg, u Anasthasius Ryndongsngi u la ioh khur haduh 107 points bad ha ka wat kaba ar da 112 points kaba la biang pura ia u ban ioh khur haduh 219 point. U Wanbhabianglang Thabah, u Laikmenlang Kharkongor bad u David Lyngdoh ki la long ki lahduh ha ka 61 kg, 55 kg bad 40 kg.
Ki nonglehkai ka East Khasi Hills ka la ioh khur ia ka takma ksiar ha ka kyrdan 81 kg lyngba u Edegar Benneth Jana uba la ioh khur 140 points.
Na West Garo Hills ha ka jingiakhun ha ka kyrdan 67 kg, u Raksil N Sangma, u la ioh khur 142 points bad ioh ia ka takma ksiar katba na South-West Khasi Hills ka la don tang uwei ba ioh ban khur ia ka takma ksiar.
Ka jingjop jong ka 5th Meghalaya Games, 2024 ka dei ka sakhi jong ka jingkiew ki kam ialehkai bad kilan met kaba ap ia ka lawei ba phyrnai jong ka jylla.
Ha ka jingiakren bad uwei na ki nongialehkai rahnar ba la paw pyrthei, uba la jop ia ka takma Rupa ha ka Olympics bad ka takma ksiar jong ka Commonwealth Games u Robert Kabbas uba dei ruh u nonghikai bad u nongai mynsiem jong ka Meghalaya Elite Pathway program u la ong, “ka rukom pyniaid ia ka 5th Meghalaya Games ka long kaba paka bha. Nga ai khublei ia ki nongialehkai baroh. Ka Weightlifting ka dei ka jingialehkai kaba biang bha ha ka Jylla ba ka jingdon ryngkatlang jong nga kan pynpoi ia kine ki khynnah sha ka thong bad ngi kyrmen shisha ba kin poi sha ka thong.”
