Tura, K’lyngkot 18 : Ka jingialehkai phutbol Under-18 ki kynthei bad shynrang jong ka Meghalaya Games kan jam sha ka final ka ban long lashai ka sngi ka 19 tarik u Kyllalyngkot 2024 ha ka PA Sangma Stadium, Tura. Ha kane ka kynti ka kynhun ki thei bad ki rang ialehkai ka Ri Bhoi District ki la jam sha ka final.
Ha ka jingiakhun semi final ki kynthei, ka Ri Bhoi District bad ka East Khasi Hills District ki la jam sha ka phainal hadien ba ki la lah ban pynliem ia ka Eastern West Khasi Hills bad ka South West Khasi Hills.Haba phai sha ki jingiakhun kiba la long mynta ka sngi ha PA Sangma Stadium, Tura, ki thei ialehkai ka Ri-Bhoi District ki la lah ha ka ban pynliem noh ia ka Eastern West Khasi Hills District da 5-1.
Ka nam tam ha kane ka jingiakhun dei ka Imaia Shylla kaba marwei ka la ioh ba kan thep haduh 4 tylli ki kol bad sa shi kol la thep ia ka da ka Rimika Khongkai, katba ia ka shi kol naka bynta ka Eastern West la thep ia ka da ka Rympeibasuk Syiemlieh.
Katba na ka liang ki thei ialehkai jong ka East Khasi Hills ki la lah ban pynliem noh da 5-0 ia ka South West Khasi Hills, kaba hangne ka nam tam jong ka jingiakhun dei ka Inrilaidor Khongthaw, kaba la ioh ban thep ar kol, bad ia ki kol kiba sah la thep ia ki da Melaribha Lyngdoh, Ibashembha Khongsit bad ka Ideibanrishisha Kharpan.
Katba ha ka jingiakhun jong ki shynrang, ka kynhun ialehkai jong ka Ri Bhoi District ki la pynliem noh ia ka East Khasi Hills da 2-1 kol, ha kaba ia ki ar kol ka Ri Bhoi la thep da u Fairwin Nongkseh bad u Melvern Lyngkhoi, ia ka shi kol jong ka East Khasi Hills la thep da u Rodrygo Sympli.
Katba ka West Jaintia Hills ka la lah ban pynliem ia ka West Garo Hills da 2-0 kol bad ia kine ki kol la thep da u Dawansalanmi Malang bad u Tiros Kyndait.Kumta kaba sah ka long ba ka jingiakhun ia ka kyrdan kaba lai jong ki kynthei kan long hapdeng ka Eastern West Khasi Hills pyrshah ia ka South West Khasi Hills ha ka por 12:30 mynsngi bad ha ka por 2:30 nohphai sngi ka jingiakhun kan long hapdeng ki rang ka East Khasi Hills pyrshah ia ka West Garo Hills.Katba ka final jong kane ka jingiakhun kan long ha ka por 5 baje janmiet ha kaba ki thei ka Ri Bhoi kin aireng pyrshah ia ka East khasi Hills bad ha ka por 7 baje janmiet ki rang ka Ri Bhoi Distrcit kin ia aireng pyrshah ia ki West Jaintia Hills.”
