Tura, K’lyngkot, 19: Ki Pulit jong ka Tura Police Station ha ka sngi thohdieng ki la kem ia uwei u briew uba la rung jubor hapoh ka Pa Togan Nengminza Athletic Stadium, Tura bad pynjulor ia katto katne ki bynta jong ka madan mareh sports. Hadien ba la kem ia une u briew, ki Pulit ki la rah noh sha thanat na ka bynta ban pynlong ia ka jingtohkit.
Ka Director jong ka tnat Sports and Youth Affairs jong ka Sorkar Jylla ha u kyrwoh ba la phah sha ki lad pathai khubor ka la ong, “ka jingpynjulor bad ka jingpynjot ia ki mar nongkynti jong ka Sorkar ka dei ka kam bymman kaba ngat ha ka jingshah pynshitom. Lah ruh ban kdew hangne ba kum kine ki jingleh beaiñ ka long kum ka jingpynjot ia ki jingmyntoi ba la mang kyrpang na ka bynta ka bha ka miat jong ki paidbah bad ka jingkyntiew ia ka sports.”
“Ka Pa Togan Nengminza Athletic Stadium, Tura ka long ka shlem ba kongsan bha na ka bynta ki nongialehkai sports jong ka thaiñ, ki khynnah bad ki samla jong ka Tura kiba angnud ban pyntbit ialade ha ka jingialehkai sports, nalor ba ia kane ka madan la ainam sha u nongialeh laitlaid. Kane ka jingleh riewkhlaaw, ym tang ba ka long ka jingpynjulor ia u Athletic Track hynrei ka long kum ka jingkhanglad ia ka jingangnud jong ki khynnah, kaba pynpaw ruh ia ka jingbym don jingkitkhlieh na ka bynta ka jingmyntoi jong ka imlang ka sahlang,” la bynrap u kyrwoh.
“La kyntu ia ki paidbah ba kin long kiba peitngor bad ban ai jingtip lada ki lap ia kino kino ki jingpynjulor ia kane ka madan ialehkai kaba la shna khnang na ka bynta ka jingmyntoi jong ka imlang ka sahlang. Ka jingiatreilang bad ka jingkitkhlieh lang jong ka imlang ka sahlang ka long kaba donkam ban pynneh pynsah bad ban iada ia ki nongkynti u paidbah,” la ong shuh shuh ka Director.
