Shillong, Rymphang, 24: U MLA ka 19 South Shillong Konstitwensi u Bah Sanbor Shullai u la leit ban jurip ïa ka Police Station kaba don ha Laban na ka bynta ka jingthmu ban shna noh ïa ki ïing sah jong kiba trei ha katei ka station ka jingthmu hi ka dei ban shna ïa ka Police Quarter kaba la ïoh ka jingmang tyngka na ka sorkar pdeng bad kaba la ïaid lyngba ka jingtyrwa jong u bad kaban pyntrei da ka Police Engineering wing jong ka tnat pulit.
Haba ïakren bad ki lad pathai khubor u Bah Sanbor Shullai uba dei ruh u Chairman jong ka MTDC u la ong ba ka jingmang na ka bynta ban shna ïa ka quarter kaban donlang bad ka Multiple parking lot la mang ha ka dor kumba T. 4, 72,8000 lak kaba dei ka jingtei kaba 2 tylli ha ki 6 unit kaba dei ka LS Quarter RCC building kaba dei ka mala ka G+2 bad ka por kadei hi hapoh ki 24 bnai kaban ngiam kumba 20 ïing.
Ha kane ka jingleit jurip kaba la ïadonlang u Bah R Nongseij u Engineer ka tnat pulit, u OC ka Laban police station bad u Rangbah Shnong u Bah Edward Kharwanlang bad ki nongïalam shnong. Ha kane ka sngi u Bah Sanbor u la leit ruh ban jurip ïa ki nala ban shna noh shen ka Aqueduct Drainage kaba la ud da ki nongshong shnong bad kaba long na ka surok PWD kaba long hajan ka jaka sah ka Kong Glorimai Laban shaduh ka Surok sha St. John Laban Parish kaba hab ha madan Laban kaba long ka jingmyntoi ïa kiba ïaid lynti bad ki Khynnah skul kaba la mang hapoh ka SPA state PWD scheme kaba la mang T. 55, 29,000 lak ha kaba ïa kine ruh yn sa sdang noh shen ban shna noh bad tang shu lah dep ka dorbar mang tyngka ka kam kan sa ïaid noh shakhmat.
Na ka Liang u Bah Sanbor u la ïathuh ba lah bun bun snem ki nongtrei kane ka tnat pulit ki la sah ha kine ki quarter kiba rim naduh ki por ka sorkar Assam bad kine ki ïing ki long ki la pei ki tnum ïing bad kiba lah sniew.
Halor kine ki ïing u la ong ba u la ïoh ban tyrwa sha ka sorkar bad mynta la ïoh ka jingmang pisa.
“Ïa kine ki ïing ba la sniew yn pynpra noh bad shna thymmai kumjuh ruh ban shna jaka ïeng kali ban thep ïa kine ki kali ba dang don case jong ka thanat pulit kiba la shu buh bad pynïeng ha rud surok.
Nga ai khublei ïa u Myntri Rangbah ka jylla u Conrad Sangma, ïa u Bah Prestone Tynsong bad ïa u Bah Lahkmen Rymbui uba la long kum u Myntri ki Kam Pohïing barim kiba la shim khia ban pynïoh ïa ka jingmynjur bad ka jingmang tyngka,” ong u Bah Shullai.
