Shillong, Nailar 16: Hynñiew ngut ki dkhot jong ka National Liberation Council of Nongkyndong ba la pynkha da ki samla na rilum Khasi bad Jaintia da ka jingthmu ban hiar thma ia ka Sorkar bad ban leh ia ki kam pyntriem ha kane ka jylla Meghalaya ki la shah kem ha ki Pulit jong ka Jylla ha ka 16 tarik u Nailar, 2023.
Katkum u kyrwoh ba la phah sha ki lad pathai khubor da u Deputy Inspector General of Police (Eastern Range), Meghalaya, Shillong u Davis Nestel R. Marak, la iathuh ba ki Pulit jong ka Jylla Meghalaya ki la ioh ia ka jingtip kaba bniah na ki tnat syntiat halor ka jingmih pyrthei jong kane ka kynhun kieng atiar kaba la sdang ban thied ia ki tiar siat, ban dawa pisa jubor, ban pynrung dkhot bad ban leh ia ki kam pyntriem.
Une u heh Pulit u la iathuh ba ki tnat syntiat ki la ioh ia ka khubor kaba thikna ba kane ka kynhun kieng atiar ba thymmai ka la iatreilang bad kiwei pat ki kynhun kieng atiar na ka jylla Nagaland bad la thmu ruh ban phah pyntbit ia ka kynhun ba nyngkong eh sha ka Jylla Nagaland ha ka 17 tarik u Nailar, 2023.
Lyngba kane ka jingioh jingtip, ka tnat Pulit ka la pynlong ia ka jingkhynra kaba jur ha ka step jong ka 16 tarik u Nailar, 2023 bad hynniew ngut ki dkhot ki la ngat ha ka kti jong ki Pulit na ki bynta bapher bapher jong ka Eastern Range ba kynthup ruh ia uwei u khynnah uba dang hapoh 18 snem ka rta uba la shah kem na East Khasi Hills District.
Halor kane, ki Pulit ki la rejistar da ka criminal case ha Crime Branch Police Station, Eastern Range, Shillong hapoh ki kyndon bapher bapher jong ka Indian Penal Code bad hapoh ka Unlawful Activities (Prevention) Act.
Kine kiba la shah kem ki kynthup ia u Self Styled Chairman, u Commander in Chief, u General Secretary bad ki Area Commander jong ka West Khasi Hills, ka Jaintia Hills, ia ki nongpynrung dkhot , ia u nongbuh jingtip jong kane ka kynhun bad sa lai ngut kiwei pat ki dkhot jong kane kynhun.
Ha ka jingtohkit kaba bniah ban lap dien ia ki jaka riehtngen jong ki dkhot kane ka kynhun, ki Pulit ki la ioh kurup ruh ia ki tiar ba donkam ba kynthup ruh ia ki mobile phone bad kiwei kiwei ki kot ki sla.
Haduh mynta ki Pulit ki dang pynlong ka jingthwet kaba jur ban iohkem ia ki dkhot jong kane ka kynhun bad ka jingtohkit halor kane ka jingmih pyrthei kane ka kynhun kieng atiar ka dang iaid shakhmat.
