Mairang, Nailar, 16: Ryngkat lang bad ka ri India hi baroh kawei ha Eastern West Khasi Hill’s District ha ka 14 tarik u Nailar 2023 ka la rakhe kynmaw burom ia ki lai ngut ki martyr jong kane ka district kiba la len lade bad aiti ia la ka jong ka jingim ban iada ia ka ri na ka kti jong ki nongshun.
Ki lai ngut ki martyr kiba la kynmaw burom ha kane ka sngi, ki long u Bah Eldrin Lyngdoh Nonglait uba sah ha ka shnong na Kynshi Bangla uba dei u Pulit Constable jong ka 3rd MLP Battalion uba la khlad na ka jingshah pynbthei bom IED bad shah siat ha ki suba lehnoh Garo National Liberation Army (GNLA) ha u snem 2014, nangta u Bah Riphinstone Lyngdoh Kynshi na ka shnong Langtor uba dei u Pulit Constable jong ka 3rd MLP Battalion uba la khladnoh na ka jingshah siat ha ki suba lehnoh Achik National Volunteer Council (ANVC) ha u snem 2002 bad u Bah Donbor Nonglait na ka shnong Nonglait uba dei u Pulit Constable ka Special branch uba la khlad na ka jingshah siat ha ki suba lehnoh Hynniewtrep National Liberation Council (HNLC) ha u snem 1996.
