Khliehriat, Nailar, 16: Ka Jaintia Student Union, Khliehriat Circle hapoh ka jingialam jong u President u Bah Livingson Dkhar Sama ki la iakynduh ia ka Myntri ka tnad ka Koit ka Khiah ka Sorkar Jylla ka Dr. Ampareen Lyngdoh ha ka jingleit iuh kjat jong ka ha Khliehriat ha ka 15 tarik, Nailar, 2023.
Ka Myntri ryngkat ki dkhot ka seng kiba la leit jurip ia ka Khliehriat Civil Hospital ki la iakynduh ruh ia ki nongtrei jong kane ka hospital kynthup ia ki doctor bad ia u District Medical & Health Officer jong ka East Jaintia Hills District.
Ha kajuh ka por, ki dkhot ka seng ki la pynsngew ia kiba bun ki jingduna ha kane ka jaka ai jingsumar bad na ka liang jong ka Myntri ka la kular ban shna pynheh ia kane ka Hospital khnang ba ki paidbah kin ioh ia ka jingsumar kaba janai.
