Shillong, Naitung, 01: Ka jinglong jingman jong ka Sub Centre kaba don ha Umsih, Puksora, South West Khasi Hills District ka la long kaba sangsot haduh katta katta hadien ba la lap ba ka don ka jingpei um kaba long kumba mih ka umpohliew hapdeng ka kamra ha kane ka SubCentre.
Kaba kham pynlyngngoh shuh shuh ka long ba ym dei tang ka jingtei barim kaba jaw um hynrei wat ka Building thymmai kaba dang shu dep shna ruh ka la jaw um bad ki jingkhang ruh kim da long bha ban khang.
Kane ka jingpei um jong ka Sub Centre ka pynlong ia ki nongtrei ba kim biang shuh ha ka rukom ai jingsumar ia ki nongwan shim dawai, kumjuh ruh ban sah ha kane ka jaka hynrei ka la pynwit bad ktah ruh ia ka jingtreikam pura jong kane ka Sub Centre.
Ha ka jingleit jurip jong ka Khasi Students Union (KSU) Ranikor Circle la lap ia kine ki jingshisha bad ka seng ka kyntu ia ka Engineering Wing jong ka tnat ka Koit ka Khiah bad kumjuh ruh ia u District Medical and Health Officer (DM&HO) jong ka South West Khasi Hills District ban phah peit bad phah maramot mardor khnang ba kan ym buh jingeh ia ki nongtrei ba dei ban sah ha kane ka jaka bad khamtam eh ia ki nongshim dawai na kane ka jaka sumar.
