Shillong, Rymphang, 6: Hynñiew ngut ki nongthoh poitri ba pawkhmat ka Jylla Meghalaya ki la leit ban iashim bynta ha ka “South Asian Literature and Cultural Summit 2024 ba la pynlong ha ka Ri Bangladesh ia kaba la pyniaid da ka “ Weekly Bwazra Katha & Association For South Asian Culture and Literature (AFSACAL).
Ha kane ka jingïakynduh lang ba la iashim bynta da ki nongthoh poitri na ki 8 tylli tylli ki ri la pule ruh ia ki poitri ba la thoh da ki myllung bapaw na kylleng ki ri bad la pynshongkun ruh da ki jingrwai na ka samla Evanisha Pathaw bad ïa ki jingshad na ki nongshad bapaw na Murshidabad.
Ia ka kynhun ki nongthoh poitri na kane ka jylla Meghalaya la lamkhmat da ka Professor Streamlet Dkhar kaba dei ka Head jong ka Khasi Department, North Eastern Hill University kaba la iohpdiang ia ka ïa ka khusnam kum ka Myllung bad Nongthoh bapaw jong ka jylla Meghalaya. Kiwei pat ki nongthoh poitri kiba la leit ban iashim bynta lang ki kynthup ia ka Dr.Solony Bareh kaba dei ka Assistant Professor bad nongthoh kot, ka Dr. Melony Bareh, ka Kong Bakhiamon Rynjah kaba dei ka Assistant Professor, ka Kong Lucky Kharpuri kaba dei ka nongthoh poitri, ka Kong Evanisha Pathaw ka nongtrei monsngewbha bad ka nongthoh poitti, ka Kong Mary Everest Bamon kaba dei ka nongtrei mon sngewbha bad ka nongthoh poitri.
Nalor kata, ha kane ka jingialang la kyntiew ruh ia ka lama jong ka India ha ka jingplie ia ka lympung jingialang.
Ki Myllung na ka Jylla Meghalaya ki la ïoh ka lad ban pule ïa ki poitri ki jong ki ha ka Ktien Khasi bad ryngkat ka jingpyninam ia ka jingshad tynrai u Khasi ha kaba ki myllung ki la iashim bynta lang ban shad ha ryngkat ka riam tynrai kaba la pynshoh biej ia ki nongiashim bynta.
Ha kane ka lympungbah kaba lai sngi kynthih ki nongiashim bynta ki la ïoh bun ki jingmyntoi khamtam eh ki la ïoh ban pyni ïa ka jingriewspah jong ka ktien Khasi bad kumjuh ruh ka riam Khasi.
Kaba kham sngewtynnad shuh shuh ïa ki nongïashim bynta ka long hadien ba ka Prof. Streamlet Dkhar ka la batai halor ka jingkhraw bad ka jinglong kyrpang jong ka jaidbynriew Khasi kiba ai jait sha ka kmie.
Ka Prof. Streamlet Dkhar ka la shah jied kum ka Adviser jong ka na ka bynta ka samoi treikam 2024 haduh 2026.
