Shillong, Rymphang 6: Ki Pulit jong ka Pasteur Beat House ha ka sngi baar ki la kem ia ki arngut ki shikurim halor ka jingsuba ba la kynnoh ba ki dei kiba ju donkti ban khaii be-aiñ ia u drok.
Ki Pulit kiba la ioh bat ha jingkieng Lad Lawmali, Shillong ia kine ki shikurim ryngkat bad u khun uba dang rit katba ki dang shong hapoh ka kali Hyundai kaba don ia u nombar AS-01 AT 0888 ha ka por kumba 11:30 baje mynstep.
Na ka met jong kine ki arngut ki shikurim ki Pulit ki la ioh kurup 2.10 gram u drok heroin, 8 tylli ki dawai kuli Nitrazepam, ar tylli ki dawai kuli Spasmo proxyvon (SP), 10 tylli ki thyrnia injekshon, 6 tylli ki mobile phone, kawei ka wait otdoh, ka pisa T.9,710, kawei ka Scooty kaba don ia u nombar ML05 R 8293 ia kaba la lap najan kane ka jaka ba la pyndonkam da uwei na ki nongkhaii drok, 10 tylli ki tin duma, 66 tylli ki tyndong ba thep ia u drok heroin bad kawei mobile phone ba la sniew.
Ki nongialam ka Federation of Khasi Jaintia and Garo People (FKJGP) Shillong City ka la ioh ujor la bun bunsien halor ka kali Hyundai AS-01 AT 0888 kaba ju ieng ha ka thaiñ Polo ban die sopsop ia u drok bad mynta ka sngi tang shu iohi ia kane ka kali la pyntip noh sha ki Pulit jong Pasture Beat House.
Shwa kane, ki dkhot ka FKJGP Shilong City ki la pyntip ia kane ka jingjia sha ki nongkitkam jong ka Seng Samla Lawmali ban wan sakhi lang ia kane ka jingiohbat ia ki nongkhaii drok bad ban aiti ha ki Pulit.
U General Secretary ka FKJGP Shillong City u Bah Shane Nongrum u la pynpaw ia ka jingbynñiaw ia ka jingkharoi ki nongkhaii drok ki bym sheptieng shuh wat ia ka aiñ.
