Shillong, Risaw, 23:Ka Kynhun Myntri jong ka Sorkar Jylla ha ka sngi Balang ka la mynjur ïa ka jingtyrwa ban shim ram na ka Asian Development Bank (ADB) na ka bynta ban pyntreikam ïa ka projek Support Human Capital Development ha Meghalaya – Phase – II.
Ka Myntri jong ka Sorkar Jylla ka Dr. Ampareen Lyngdoh ha ka jingïakren bad ki lad pathai khubor hadien ba la wai ka jingïalang jong ka kynhun Myntri kaba la long ha Resubelpara, North Garo Hills ka la ïathuh ba 90 percent na ka ram yn sa mang kum ka Grant sha ka Jylla, ïa kaba yn sa siew da ka Sorkar Pdeng bad ïa ka 10 percent jong ka ram yn sa siew da ka Sorkar Jylla.
“Katkum ka Cabinet Note, ka Sorkar mynta kan sa lah ban ïoh ïa ka Grant ba 90 percent na ka ADB na kane ka ram, 10% na kane ka ram yn sa hap ban siew hi da ka Sorkar Meghalaya ha ki snem ki ban sa wan. 90% na kane ka ram yn sa siew da ka Sorkar Pdeng kumba ju leh baroh shi katta ki snem,” ka la ong.
