Shillong, Kyllalyngkot, 16: Ka jingïalang Kynhun Myntri ka Sorkar Jylla ha ka sngi Thohdieng ka la mynjur ban pynjlan ïa ka jingshakri jong ki ophisar kiba la shongthait na ka kam namarba ka Sorkar ka dang sngewdei ba kin dang bteng ïa ki kam hadien ba ki dang don ki projek ba dang sahteng ba ki dang dei ban pyndep.
U Myntri Rangbah ka Jylla u Conrad K. Sangma ha ka jingïakren bad ki lad pathai khubor u la ïathuh ba ka Sorkar ka la mynjur ban pynjlan ïa ka jingshari jong u Superintendent Engineers ha ka Directorate of Urban Affairs na ka bynta lai bnai.
Ka Sorkar ka la rai ban pynjlan ïa ka jingshakri jong u Bah Robert Lyngdoh uba dei u ophisar ha ka tnat Planning ha ka Meghalayan Age Limited bad ïa ka jingshakri jong u Bruce P. Marak u Chief Engineer ba la shongthait uba trei ruh kum u Adviser ha ka Meghalaya Integrated Transport project kaba dei kaba projek jong ka World Bank.
Ha kane ka sngi, ka kynhun myntri ka la rai ruh ban ai ïa ka khusnam Meghalaya Day na ka bynta ka “U Tirot Sing Award for Arts & Literature” sha u Dr. K.S Nongkynrih, ïa ka Patogan N. Sangma Award for Social Services sha u Fr. Binoy Joseph bad ïa ka ‘U Kiang Nangbah Award for Sports and Games” sha ka Kong Riïohlang Dhar.
