Shillong, Rymphang 6: Ka tnat Pynroi Sor jong ka Sorkar Jylla ha ka sngi baar ka la ai jingmynjur ia ka Dorbar Shnong Pynthorumkhrah Golflink ba kan peit, ban sumar bad ban pyniaid ia ka Children’s Park kaba don ha lyndet jong ka Hawker’s Market, Golflink ter ter shaduh Dogs Squad.
Kane ka jingmynjur ka long hadien ba u MLA ka Pynthorumkhrah Constituency Bah Alexander L. Hek u la lum da ka jingialang mynta ka sngi hapdeng ki nongkitkam jong ka shnong Pynthorumkhrah-Golflink bad ki ophisar ka tnat Pynroi Sor.
Ha ka jingialang la sakhi lang da u Director ka tnat Pynroi Sor u Bah E. Kharmalki, u Superintendent Engineer Bah K. Wahlang, u Rangbah Shnong Bah Michael Hek bad kiwei de ki nongkitkam shnong.
Ha ka lah sngi U Blei, ka Dorbar Shnong Pynthorumkhrah-Golflink ka la phah da ka jingthoh sha u Myntri Rangbah ka Jylla u Conrad K. Sangma ban pyrshah lada aiti ban pyniaid ia ka Park sha ka Shillong Golf Club.
Dang khyndiat sngi, ka Dorbar Shong bad u MLA ki la pynlong ia ka jingjurip ia ka jaka kaba don ha lyndet jong ka Hawker’s Market, Golflink ter ter shaduh Dogs Squad na ka bynta ban shna ia ka Children’s Park bad ka Dorbar Shnong ka la pynpaw hakhmat u MLA ba kan pyrshah lada aiti ia ka Shillong Golf Club ban pyniaid ia ka Park.
U Bah A.L. Hek uba long ruh u Myntri ka Sorkar Jylla u la pynpaw ba ka jingthmu ban shna ia ka Children’s Park ka dei ka projek na ka bynta ka bha ka miat hapoh ka shnong ka ban pynmyntoi ia ki paidbah bad ia ka shnong Pynthorumkhrah-Golflink.
Ki nongkitkam ka Dorbar Shnong ki la mynjur ba kim don ka jingpyrshah ia ka projek hynrei ki don ka jingsngewkhia ba ki samla jong ka shnong ki dei ban ioh ia ki kam ki jam na kane ka projek.
Hadien ba la poi sha ka jingiasngewthuh jingmut, ki ophisar na ka tnat Pynroi Sor ki la pynpaw ba kim don jingwit ban ailad ia ka Dorbar Shnong ba kan pyniaid, ban sumar ia ka Park.
Ia ka soskular iasngewthuh jingmut yn sa pynkhreh shwa ban aiti sha ka Dorbar Shnong.
