Ka komiti ba la khlieh da ka Myntri sorkar ka Dr. Ampareen Lyngdoh ka la shong ïa ka jingïalang ba nyngkong eh jong ka mynta ka sngi ka 29 tarik u Jymmang , 2023. Lait na ka Voice of the People Party (VPP) baroh ki seng saiñpyrthei ki la wan sha kane ka jingïalang kynthup ka GNC kaba la ïashim bynta da u Augustine Marak lyngba ka Video Conference.
Haba kren sha ki lad pathai khubor hadien ba la wai ka jingïalang, ka Dr. Ampareen ka la ïathuh ba baroh ki seng saiñpyrthei kiba don ha ka jingïalang ki la mynjur da kawei ka sur ïa ka Roster System ba la pynkhreh da ka sorkar. Ka la ïathuh ba baroh ki rai bad ki jingai jingmut ba ki la pynsngew yn phah sha ka sorkar ba kan leh ïa kaba donkam.
Ka Dr.Ampareen ka la pyntip ba baroh ki seng saiñpyrthei ki la hun ïa ka Roster System lait noh tang ka VPP ka bym don ha ka jingïalang. Ka la pan por na ka sorkar ba kan ailad shuwa ïa ka komiti ba kan sngap ïa ka jingpynsngew na ka liang jong ka VPP khnang ba kan long kaba mih na ka sur jong baroh.
Ka la ïathuh ba kane ka komiti ka la kyrpad ruh ïa ka sorkar ba kan kynthup ïa ka Reservation Policy kum kawei na ki mat ban ïakren khnang ban ïoh ailad ïa ka VPP ruh ba kan pynsngew ïa ka sur jong ka bad ba kan pyni ïa ki mat jong ka sha ka komiti. Yn ailad biang ruh sa shisien ïa baroh ki seng saiñpyrthei ba kin pynsngew ïa ki mat jong ki halor ka Reservation Policy.
Ha ka 31 tarik mynta u bnai kan don ka jingïalang ba la khot da u Myntri Rangbah ka jylla u Conrad K. Sangma ïa ki kynhun seng bhalang bapher bapher bad ha katei kajuh ka sngi ka Dr. Ampareen ka la pyntip ba kan don ruh sa kawei pat ka jingïalang jong ka komiti ha ka por 2:30 baje nohphai sngi bad sa shisien biang ka la wer ïa ka VPP ba kan wan ban ïashim bynta lang ha kane ka jingïalang khnang ba ka komiti kan ïoh ban sngap ïa ki jingpynsngew jong ka.
