Shillong, Jymmang, 29: U MLA jong ka Nongstoiñ Constituency u Bah Gabriel Wahlang u ladep phah da ka jingthoh sha ka Myntri ka Koit ka Khiah jong ka Sorkar Jylla ka Dr. Ampareen Lyngdoh ban pynpaw ia ka jingpyrshah halor ka jingthmu ban kit noh ia ki tiar napoh ka Maternity and Child Health (M&CH) Hospital Nongstoiñ, West Khasi Hills District sha Civil Hospital, Mawkyrwat, South West Khasi Hills District.
Kane ka jingphah jingthoh jong u MLA sha ka Dr. Ampareen Lyngdoh ka long hadien ba u Mission Director jong ka National Health Mission u Ram Kumar u la phah da ka shithi sha u Medical Superintendent jong ka Nongstoiñ Maternity and Child Health, Hospital ha ka 12 tarik mynta u bnai ban phah pynkit lut ia baroh ki tiar ba la thied da ka National Health Mission na ka bynta ka Nongstoiñ Maternity and Child Health, Hospital sha ka Mawkyrwat Civil Hospital, South West Khasi Hills District khnang ban ioh pyntreikam pura noh ia ka Mawkyrwat Civil Hospital kaba la biang pura ia ki nongtrei ryngkat bad ka Labour Room/Operation Theater.
Ha ka shithi, u Mission Director u la pyntip, ba ia ka Nongstoiñ Maternity and Child Health, Hospital yn sa ai da ki tiar kiba thymmai ha ka por kaba biang. “Ia kane la mynjur da ka Executive Committee jong ka National Health Mission,” la pynpaw ka shithi na u Ram Kumar sha u MS ka Nongstoiñ Maternity and Child Health, Hospital.
Halor kane, u Bah Gabriel, u la dawa ia ka Sorkar Jylla ba ka dei ban plie paidbah mardor ia kane ka Hospital ka ban long ka jingmyntoi na ka bynta ki paidbah jong ka West Khasi Hills District.
