Shillong, Risaw, 24: U Lat ka Jylla Meghalaya u CH Vijayashankar dang shen u la shon muhor hynriew tylli ki Aiñ-rew ba la mynjur da ka Khasi Hills Autonomous District Council (KHADC).
Ïa kane la pyntip da u CEM ka KHADC u Bah Pynïaid Sing Syiem da kaba ong, “hynriew tylli na ki hynñiew tylli ki Bill la ai jingmynjur da u Lat ka Jylla.”
Kine ki kynthu ïa ka Khasi Hills Autonomous District (Administration of Elaka) (Amendment) Bill, 2023, ka KHAD (Nomination and Election of the Lyngdoh, Myntri, Lyngdoh Raid and Sordar Shnong and Administration of Sohïong Lyngdohship, 2023, ka KHAD (Regulation and Administration of Land) Rules, 2023, ka United Khasi-Jaintia Hills District Fishery (Amendment) Bill, 2023, ka KHAD (Khasi Social Custom of Lineage) (Amendment) Bill, 2023 bad ka KHAD (Trading by Non-Tribals) (Amendment) Rules, 2023.
“Ka jingmynjur jong u Lat ka Jylla ïa ka KHAD (Administration of Elaka (2nd Amendment) Bill 2023 kan pynkhlain ïa ka jingtrei kam jong ki Dorbar Shnong namarba lyngba kane ka ain la ithuh ïa ka jingtreikam jong ki Seng Samla Shnong bad ki Seng Kynthei ha ki shnong kiba hap hapoh u pud u sam jong ka Khasi Hills Autonomous District Council.
U la ïathuh, lyngba kane ka ain, ki Dorbar Shnong ki la lah ban buh rekod ïa ka rung ka mih jong ki briew kiba nabar bad kumjuh ruh ki Seng Samla bad ki Seng Kynthei ki la lah ban ai ka jingïatreilang bad ki Dorbar Shnong haba ïohkem ïa ki nongkhaii, ïa ki nongdih drok bad ïa kino kino kiba leh ïa ki kam runar ruser hapoh hapoh u pud u sam jong ka shnong.
U la ong ba kane ka ain, kan long ruh kum ka dur jong ka Inner Line Permit ka ban sa treikam hapoh ki shnong ki thaw nangne shakhmat.
Halor ka United Khasi Jaintia Hills Distirct Fisheries (Amendment) Bill, 2023, u CEM ula ong ba Khasi Hills Autonomous District Council ka la ïohbor ban pyrkhing ïa kine ki jingïakob khwai dohkha.
U Bah Syiem u la ïathuh ba ka Fisheries Act ka dei kaba la don lypa bad dang shen ka Council ka la sngewdei ban wanrah ïa ka jingpynbeit thymmai ha ki katto katne bynta namarba ka Principal Act jong ka Bill ka la aibor ïa ka District Council ban peit bad ban khmih ïa ki wah kiba rit bad ki wah kiba heh ha Ri khasi na ka bynta ban ïada ïa ki dohum dohwah bad ki dohkha doh pnat.
U la ïathuh ba ha ka jingpynbeit thymmai ba la shon muhor da u Lat ka Jylla, ka District Council ka la wanrah shuh shuh ïa ki katto katne tylli ki kyndon ha ka jingpynlong ïa ki jingïakob khwai ban pyrkhing da ka ain ha kaba kan don ka jingïasngewthut jingmut hapdeng ka District Council bad ki bor synshar District ha kaba ai ai jingbit ïa kino kino ki jingïakob.
