Shillong, Lber, 09: Bun ngut ki samla Khasi ki la mynsaw hadien ba ki la shah bom shah tied ha ka kynhun ki bar jylla kiba don kumba 30 ngut eiei.
Kane ka la jia ha Keating Road ha ka step sngi Saitjaiñ ha ka por kumba 11:30 baje mynstep.
Napdeng ki samla Khasi kiba shah bom shah tied saw ngut ki don hapoh Civil Hospital Shillong hapdeng ka jingshah sumar.
Kine ki samla Khasi ki la ïathuh ba ka daw ka dei na ka jingjia ha ka miet sngi Thohdieng ha kaba ka don ka jingïatynrah Scooty para Khasi hynrei katba ki dang ïakren pynbeit ïa kane ka jingjia, ki bar jylla ha Keating Road ki la mih ban byrngem byrsit ba kim dei ban wan hylla ha shnong jong ki.
Ha ka step kaba bud, kine ki samla Khasi ki la leit ban ïakren pynbeit biang ïa ka jingjia kaba jia mynmiet hynrei kumba 30 ngut eiei ki bar jylla ki la mih bad ki la rah da ki dieng ki siej bad kiwei pat ki tiar pynmynsaw ban bom naphang ïa ki.
Katkum ka jingïoh jingtip, la ïathuh ba ki bar jylla kiba shong basah ha Keating Road ki la kynnoh ba dei ki samla Khasi kiba sdang nyngkong ban pynmih ïa ka huri hura.
Haba ïakren bad uwei na ki, u la ong ba ka la don ka jingïania bad ka jingïashoh ïadat ha ka miet 8 tarik, Lber bad na ka daw ba ka don kawei ka kali kaba khang lynti ïa u para jong u bad kata ka kam kaba mynmiet u la ong ba ka la kut noh kumta hi.
Hynrei ha ka step kaba bud pat u la ong ba ki samla Khasi ki ïa wan kumba 30 ne 40 ngut bad ki wad ïa u para jong u bad ha kata ka jingwan jong ki, ki la ong ba ki wan ban kren ïasuk hynrei ki la shoh pynban ïa u para jong u bad mynta u don hapoh Civil Hospital ba u la mynsaw bad dei hangta ba ka sdang mih ka huri hura.
Kham hadien ki Pulit ki la wan poi sha kane ka jaka ban tem ïa ka jingïakynad hapdeng kine ki ar liang mamla.
Na ka jingwad jingtip, la lap ba uwei na kiba la shah tangon ha ka por mynstep ha ha Keating Road , u dei u dkhot jong ka Hynñiewtrep Integrated Territorial Organisation (HITO).
Halor ka jingshah shoh jong une u dkhot bad kumjuh ruh kiwei pat ki samla Khasi, u President ka HITO Bah Donbok Dkhar u la leit jngoh ïa ki ha Civil hospital Shillong ban peit ïa ka jingmynsaw kaba ki la ngat ha ka jingshah thombor.
U la ong ba ka HITO kan ym treh satia ban mudui ejahar namarba kim shaniah shuh ïa ki bor jong ka aiñ namarba la bun tylli ki ejahar ba la ujor hynrei ki ong ba kam poi shano shano ruh.
U Bah Donbok u la ong ba mynta ka HITO kan peit aiu ka aiñ kan leh halor kane ka jingjia.
